Astana ákimdigi Maksım Galkınniń kontsertine ádeıi ruqsat bermeı qoıǵany ras pa

ASTANA. QazAqparat - Áleýmettik jelide reseılik telejúrgizýshi, shoýmen Maksım Galkınniń vıdeosy tarady. Onyń aıtýynsha, Qazaqstan bıligi óner juldyzynyń Almaty men Astanada kontsert ótkizýine múmkindik bermeı otyr. Osyǵan oraı Astana qalasynyń mádenıet basqarmasy málimdeme jasady, dep habarlaıdy QazAqparat.

«Bıylǵy 1 naýryzda Astana qalasynyń mádenıet basqarmasyna 8 qazanda Roza Baǵlanova atyndaǵy «Qazaqstan» ortalyq kontsert zalynda Maksım Galkınniń keshin ótkizý jóninde hat keldi. Ony joldaǵan - «TopBilet» JK dırektory R. Aslanov. Hat nómiri - № 271. 8 qazanda muǵalimder kúnine arnalǵan kontsert ótkiziletindikten keshti uıymdastyrýshylarǵa basqa kúndi nemese basqa ǵımaratty tańdaý usynyldy. Uıymdastyrýshylardan budan basqa hat túsken joq» dep atap ótti basqarma.

Osyǵan qaramastan mekeme Maksım Galkınge kómekke kelýge daıyn.

«Ustazdar kúnine arnalǵan kontsertti basqa kontserttik zalda ótkizý josparlanǵanyn eskere otyryp, uıymdastyrýshylar qaıta júgingen jaǵdaıda tıisti zańnamaǵa sáıkes Maksım Galkınniń keshin ótkizý múmkindigin qarastyrýǵa daıynbyz» deıdi vedomstvodan.