Astana ákimdigi kóshelerdi sý basyp, daýyl turatyny jóninde eskertti
ASTANA. QazAqparat - Búgin Astanada naızaǵaı oınap, burshaq jaýady, ońtústik-shyǵystan soǵatyn jeldiń ekpini 15-20 m/s-qa deıin kúsheıedi. Sondaı-aq topyraq betinde -2 gradýsqa deıin úsik júrýi yqtımal. Bul týraly «Qazgıdromet» RMK habarlady.
Qala kóshelerin, turǵyn úı sektoryn jáne jerasty ótpe joldaryn sý basyp, daýyldy jel aǵashtardy qulatýy múmkin. Osyǵan baılanysty kommýnaldyq qyzmetter kúsheıtilgen tártipte jumys isteıtin bolady. Joldarda keptelister týyndaýy múmkin. Sol sebepti júrgizýshiler qozǵalys baǵyttaryn aldyn ala josparlaǵany abzal.
«Astana bıligi turǵyndar men qala qonaqtaryn jyly kıinip, qaýipsizdik sharalaryn barynsha saqtaýǵa shaqyrady. Týyndaǵan tótenshe jaǵdaılar jóninde 109 qyzmetine habarlaýdy suraımyz», - delingen elorda ákimdiginiń saıtynda.
