Astana ákimdigi kópshilik «depýtat» dep qabyldaǵan modelge qatysty túsinik berdi
ASTANA. QazAqparat - Daýly fotosýretimen qazaqstandyqtardyń narazylyǵyn týdyrǵan elordalyq modeldiń depýtat emestigi jarııalandy. Bul týraly Astana qalasynyń qoǵamdyq damý isteri basqarmasynyń basshysy Danııar Esın aıtty, dep habarlaıdy QazAqparat.
«Kópshiliktiń talqysyna túsken model depýtat emes. Ózderińiz bilesizder, áleýmettik jelilerde Astana qalasynyń jastar máslıhatynyń depýtaty dep tanystyrylǵan jartylaı jalańash modeldiń fotosýreti qyzý talqylanýda. Bul materıaldar jeli paıdalanýshylarynyń ártúrli reaktsııasyn týdyrdy. «Astana qalasy jastar máslıhaty» qoǵamdyq birlestigi táýelsiz kommertsııalyq emes uıym bolyp otyr. Sonymen qatar ol ádilet organdarynda úkimettik emes uıym retinde tirkelgen. Sáıkesinshe, onyń Astananyń máslıhaty men jergilikti memlekettik organdarǵa eshqandaı qatysy joq», - dep jazdy Danııar Esın óziniń Feısbýktegi paraqshasynda.
Onyń sózine qaraǵanda, uıymnyń ataýy áleýmettik jeli paıdalanýshylarynyń arasynda túsinbeýshilik týdyrǵan. Keıbireýler atalǵan qyzdy halyq qalaýlysy dep oılap qalǵan.
«Bul uıymdy qurý - ol jastardyń jeke bir tobynyń bastamasy. Olar qatardaǵy qoǵamdyq birlestikti qurdy. Sondyqtan jelide kópshiliktiń qyzý talqysyna túsken qyz shyn máninde depýtat bolyp sanalmaıdy», - dep naqtylady D. Esın.
Aıta keteıik, jaqynda áleýmettik jelilerde model qyzdyń kıgen kıimi jarııalanǵan fotosýret qoǵamdastyq tarapynan synǵa ushyraǵan edi.
