Astana ákimdigi kólik qozǵalysyn tyń ádistermen rettemek
ASTANA. QazAqparat - Astana qalasynyń jolaýshylar kóligi basqarmasy joldardyń jóndelýi týraly aqparatpen bólisti, dep habarlaıdy «QazAqparat» HAA tilshisi.
«Qoldanys kezinde joldarda kem-ketikterdiń paıda bolýy - qalypty qubylys. Dese de, joldyń jaǵdaıyna klımattyq, topyraqty-geologııalyq jáne gıdrologııalyq jaılar da úlken áserin tıgizedi. Qala ishindegi joldarda qozǵalysty qaýipsiz etý úshin jolǵa jaýapty qyzmetter turaqty túrde monıtorıng júrgizip otyrady. Jolda kem-ketikter anyqtalǵan jaǵdaıda ony qalpyna keltirý jumystary júrgiziledi», - deıdi redaktsııanyń resmı suraý hatyna jaýap bergen basqarma.
Basqarmanyń jaýabyna sáıkes, joldyń ótetin bóliginde sý tunǵan usaq shuńqyrlardy qalpyna keltirý jumysyn avtokólik joldary basqarmasynyń mamandary aýdan ákimdikteriniń, Astana qalasynyń kommýnaldyq qyzmetkerlerimen birge baqylaıdy.
«Biz keshendi túrde avtokólik joldary men jol qurylymdaryna zertteý jumysyn júrgizemiz. Osynyń qorytyndysy boıynsha joldyń máseleli bólikterindegi kemshilikterdiń kózin joıý jumysy júrgiziledi. Jol boıyndaǵy kem-ketikterdi túzeý jumystary kelesi jyly jalǵasatyn bolady», - dep habarlaıdy basqarmadan.
Sonymen qatar, ákimdik kólikterdiń qozǵalysy úshin yńǵaıly ári tyń ádisterdi oılastyryp jatyr. Kelesi jyly Astana qalasyndaǵy 7 kósheniń ótpesin ońǵa burylýǵa bolatyndaı jóndeý týraly sheshim qabyldanǵan. Qazirge deıin 5 kóshe boıynsha jumys aıaqtalǵan. Naqtyraq aıtqanda, Respýblıka men Seıfýllın kósheleriniń qıylysynda ońǵa burylýǵa bolatyndaı etip qaıta jasaý 27 qazanda aıaqtalǵan.
