Astana ákimdigi káriz qudyqtaryn túgel sanap shyqpaq
NUR-SULTAN. QazAqparat - Elordada káriz qudyqtaryn túgendeý júrgizilip jatyr, dep habarlaıdy QazAqparat qala ákimdiginiń resmı saıtyna silteme jasap.
«Ashyq lıýkter máselesi qala ákimdiginiń turaqty baqylaýynda: paıdalanýshy uıymdar ótinimderge baılanysty kún saıyn ashyq qudyqtardy anyqtaý jáne joıý boıynsha jumystar júrgizýde», - delingen aqparatta.
Búgingi kúni káriz qudyqtarynyń ıesin anyqtaý boıynsha jumystar aıaqtalǵan.
Olar ashyq qalmaýy úshin jáne apattyń aldyn alý maqsatynda ákimdik ınventarızatsııa ótkizýdi bastady. Al alda iske qosylatyn qudyqtarǵa polımerli materıaldan jasalǵan lıýkter ornatylatyn bolady. Sonymen qatar, qoldanystaǵy káriz júıelerine temir torlar ornatylýda. Olar qaqpaq urlanǵan jaǵdaıda adam men jan-janýarlardyń qudyqqa qulap ketýinen qorǵaıdy.
«Qazirgi kúni temir torlar 11 myńnan astam qudyqqa ornatyldy. Jáne de balansta qudyqtary bar mekemeler olardy jabý boıynsha jumystar júrgizýde. 28 naýryzdaǵy jaǵdaı boıynsha barlyq aýdandarda 11 538 dánekerlengen torlar ornatylǵan, sonyń ishinde «Astana-AEK» AQ - 246, «Astana-Teplotranzıt» AQ - 8 121, «Astana sý arnasy» - 807 dana qorǵanysh torlar ornatty. Sonymen qatar, qalalyq Polıtsııa departamenti qudyq qaqpaqtaryn urlaýdyń aldyn alý boıynsha únemi jedel-reıdtik is-sharalar, eskertý jáne jolyn kesý boıynsha jumystar júrgizedi», - delingen ákimdik habarlamasynda.
Aıta keteıik, turǵyndarmen eseptik kezdesý barysynda qala ákimi Baqyt Sultanov qudyq qaqpaqtarynyń urlanýyn «astananyń aýrýy» degen bolatyn. Onyń sózinshe, ótken jyldyń kúzinen bastap kommýnaldyq sala qyzmetkerleri myńdaǵan ashyq qudyqty anyqtaǵan. Adamdardyń qaýipsizdigi jáne qaıǵyly jaǵdaılardy boldyrmaý úshin shahar basshysy qudyqtardy únemi tekserip, olarǵa temir torlar ornatýdy tapsyrǵan bolatyn.
