Astana ákimdigi qaladaǵy aýyz sýdyń talapqa saı ekenin málimdedi
ASTANA. QazAqparat - Astana qalasynyń ákimdigi aýyz sýdyń lastanǵany týraly «SMS» arqyly taralǵan aqparattyń shyndyqqa janaspaıtynyn resmı túrde málimdeıdi, dep habarlady qalalyq ákimdiktiń baspasóz qyzmetinen.
«Astana Sý Arnasy» jáne Tutynýshylardyń quqyqtaryn qorǵaý agenttigi kún saıyn aýyz sý synamalaryn alyp otyrady, búgingi tańda ol barlyq normalarǵa saı keledi.
«Astana Sý Arnasynyń» habarlaýynsha, Astana sý qoımasyndaǵy sý alý jáne sorǵy-súzgilik stantsııa shtattyq tártipte jumys isteıdi, qurylǵylardyń jaǵdaıy jaqsy. Sorǵy-súzgilik stantsııadaǵy sý tazalanyp, súzgiden ótip, zalalsyzdandyrylady. Sý júrgizý jelisinde beriletin aýyz sýdyń sapasy «Aýyz sý» MEM ST 2874-82 talaptaryn qanaǵattandyrady. - Sý qubyryndaǵy sýdyń sapasy barlyq óńdeý kezeńderinde únemi tekserilip otyrady. Mıkrobıologııalyq kórsetkishter táýligine 1 ret, organoleptıkalyq kórsetkishter (ıisi, túsi, tunyqtyǵy) táýligine 12 ret, qaldyq hlor saǵat saıyn tekseriledi. Sorǵy-súzgilik stantsııada kúnine 800 hımııalyq, 100 bakterıologııalyq taldaýlar júrgiziledi, - dedi «Astana Sý Arnasy» bas dırektorynyń orynbasary Sergeı Vılkov. Aýyz sýdyń sanıtarlyq normalarǵa saı ekendigin Astana qalasynyń QR Tutynýshylardyń quqyqtaryn qorǵaý agenttigi de rastady. - Búgingi tańda Astana qalasy boıynsha barlyq tazalaý qurylǵylary, sorǵy stantsııalary durys jumys istep tur, shtattyq jaǵdaıda qyzmet etedi. Biz kún saıyn turǵyndarǵa tuıyq jerlerdegi sý taratatyn kolonkalardan beriletin sýdyń sapasyna montorıng júrgizemiz, sýdyń sapasy barlyq normatıvtik talaptarǵa saı. Sondyqtan, qala turǵyndaryna sýdyń sapasyna alańdaýdyń qajeti joq, - deıdi Astana qalasynyń bas memlekettik sanıtarlyq dárigeri mindetin atqarýshy Fedor Peev.
