Astana ákimdigi gazdy 4 kompanııadan ǵana satyp alýǵa shaqyrdy
ASTANA. QazAqparat - Astana ákimdigi qala turǵyndaryn suıytylǵan gazdy akkredıttelgen fırmalardan ǵana satyp alýǵa shaqyrdy, dep habarlaıdy QazAqparat.
Tótenshe jaǵdaılardy boldyrmaý úshin otyn-energetıkalyq keshen jáne kommýnaldyq sharýashylyq basqarmasy qala turǵyndaryn gaz ballondaryn tek akkredıttelgen uıymdardan ǵana satyp alýǵa shaqyrady. Astanada mundaı tórt kompanııa bar: «Astanagazservıs» AQ («Beıbarys gaz» saýda markasy), «LPG Dıstrıbıýshn» JShS («Jiger Gaz»saýda markasy), «Gorgaz Astana 2050» JShS jáne «Kommerts Treıd» JShS.
«Atalǵan uıymdar ballondaǵy gazdy qala aýmaǵynda tegin jetkizip beredi. «Gazben jabdyqtaý salasyndaǵy zańnama buzylǵan jaǵdaıda (avtojanarmaı quıý stantsııalarynda gaz ballondaryn toltyrý, tıisti qujattardy usynbaý) iKomek ákimdiginiń biryńǵaı baılanys ortalyǵyna 109 telefony boıynsha, sondaı-aq #astana109 heshtegimen áleýmettik jelilerde dereý habarlaýdy suraımyz», - delingen ákimdik saıtyndaǵy aqparatta .
Belgili bolǵandaı, Astananyń jekemenshik sektorynyń kóptegen turǵyndary tamaq daıyndaý jáne jylytý úshin suıytylǵan gazdy paıdalanady. Gaz ballondaryn paıdalaný kezinde qaýipsizdik tehnıkasynyń saqtalmaýy men nemquraılylyq órtke, jarylysqa ákelýi múmkin. «Gaz jáne gazben jabdyqtaý týraly» Zańǵa sáıkes avto-gaz quıý stansylarynda gaz ballondaryn toltyrýǵa tyıym salynady.
Eske salaıyq, elordada 2 qańtar kúni gaz toltyrylatyn rezervýar jarylyp, saldarynan 60 sharshy metrdi alyp jatqan qoıma qırady, jaqyn ornalasqan tórt qabatty jataqhananyń terezeleri syndy. Jergilikti atqarýshy organnyń kúshimen jataqhana turǵyndaryn ornalastyrý úshin eki avtobýs oqıǵa ornyna jiberildi. Qurban bolǵandar men zardap shekkender joq.
Osy oqıǵadan keıin qala ákimi Baqyt Sultanov Astanadaǵy barlyq gaz toltyrý stantsııalaryn tekserýdi tapsyrdy.
Aıta keteıik, 2018 jyldyń 31 jeltoqsany kúni Reseıdiń Magnıtogorsk qalasynda kópqabatty úıde gaz ballony jarylyp, 40-qa jýyq adam qaza boldy.
