Astana ákimdigi gazben júretin avtobýstar satyp alady

NUR-SULTAN. QazAqparat – Nur-Sultan qalasynda gazben júretin qoǵamdyq kólikter testileýden ótedi. Bul týraly qalalyq kólik jáne jol-kólik ınfraqurylymyn damytý basqarmasy basshysynyń orynbasary Erjan Dıhanbaev málim etti, dep habarlaıdy QazAqparat tilshisi.

«Búginde elordada 99 elektroavtobýs bar. Endi qazir gazben júretin avtobýstardy satyp alý máselesin qarastyryp jatyrmyz. Aldymen testileý rejıminde baqylap kórý úshin bir gaz avtobýsyn jalǵa alǵymyz keledi. Negizinde qala avtobýstary áldeqashan gazǵa kóshýi kerek edi. Buǵan deıin elordada tabıǵı gaz bolmaǵandyqtan dızel otynymen júretin avtobýstardy satyp alýǵa týra keldi»,- dedi Erjan Dıhanbaev qalalyq máslıhattyń otyrysynda.

Onyń aıtýynsha, gazben júretin avtobýstardyń paıdasy kóp.

«Birinshiden, ekologııalyq turǵydan zııan kelmeıdi, al dızelden tútin shyǵady. Ekinshiden, gaz únemdi. Sonymen qatar, gazben júretin avtobýs qaqaǵan qysta dalada qalsa eshteńe etpeıdi. Sebebi gazdyń qatý temperatýrasy -120 gradýs. Taǵy bir artyqshylyǵy - onyń quny elektr avtobýsynan áldeqaıda arzan. Osylaısha, bıýdjetke úlken salmaq túspeıdi», - deıdi ol.

Sondaı-aq, atalǵan basqarma ókili búginde Nur-Sultandaǵy qoǵamdyq kólikterdiń 20 paıyzy eski ekenin eske saldy.