Astana ákimdigi belsendi azamattarǵa syılyq berýdi kózdeýde
ASTANA. QazAqparat - Elorda ákimdiginde «Smart Astana» mobıldi qosymshasynyń jańashyldyqtary tanystyryldy. Onda qoǵam ómirine belsendi qatysatyn azamattarǵa upaı jınaýǵa jáne olardy vırtýaldy dúkende taýarǵa almastyrýǵa múmkindik beretin "Belsendi turǵyn" atty bólim bolady, dep xabarlaıdy QazAqparat.
"Belsendi turǵyn" bólimi - áleýmettik saýalnamalarǵa, únqatysýǵa belsendi aralasýǵa jol ashady. Mysalǵa, kez kelgen azamat avtobýstarǵa arnalǵan jolaqtar týraly óz pikirin bildirýge, ol qanshalyqty yńǵaıly ekenin, taǵy qandaı kóshelerge ornatýǵa bolatynyn aıta alady. Jańashyldyqtarǵa da baǵa bere alasyzdar. Mysaly, qaladaǵy jasyl jelek otyrǵyzý unaı ma, unamaı ma, gúl otyrǵyzǵan durys pa nemese aǵash ekken jón be? Bir aptadan soń taǵy bir bólim ashylady. Ol - "Vırtýaldy dúken". Saýalnamaǵa qatyssańyz, upaı jınaısyz. Olar jeke kabınette saqtalady. Upaılardyń kerek kólemin jınasańyz, dúkennen belgili bir taýarlardy tańdaı alasyzdar", - dep atap ótti Astana ákiminiń orynbasary Malıka Bekturova.
Onyń sózinshe, ol taýarlardyń ishinde Astana brendine qatysty kádesyılar, qalalyq mádenı sharalarǵa, kontsertter men mýzeılerge arnalǵan bıletter bolady.
Búginde «Smart Astana» arqyly dárigerge, ákimdikke jazylýǵa, balabaqsha kezegine turýǵa, kommýnaldyq qyzmetterdi tóleýge, poıyz, ushaq, avtobýstardyń ýaqytyn baqylaýǵa, "109" kezekshi qyzmetine ótinish tastaýǵa, ýchaskelik polıtsııa qyzmetkerin taýyp alýǵa, EKSPO bıletterin satyp alýǵa bolady. Jalpy qosymshada 12 sala boıynsha 30 qyzmet túrin qoldanýǵa múmkindik bar.
