Astana ákimdigi balalardy balabaqsha kezegine ınternet arqyly qoıýǵa múmkindik beretin veb-portal ashty
ANA. 8 aqpan. QazAqparat /Gúlmıra Álıakparova/ - Astana qalasynyń turǵyndary balalaryn balabaqsha kezegine endi ınternet arqyly qoıa alady.
Búgin qala ákimdigi memlekettik qyzmetterdi elektrondy túrde alýǵa múmkindik beretin www.e.astana.kz resmı saıtyn iske qosty.
Baspasóz máslıhatynda málim bolǵanyndaı, qazir elorda ákimdigi memlekettik qyzmet kórsetý tizilimine sáıkes qyzmetterdiń 43 túrin usynyp otyr. Halyq jıi qoldanatyn sonyń 15-i www.e.astana.kz veb-portaly arqyly elektrondy túrde kórsetile bastady.
Astana qalasy ákimi apparaty aqparattyq tehnologııalar bóliminiń meńgerýshisi, portaldy ázirleýshi Aıdyn Kárimovtiń aıtýynsha, taıaý eki jylda memlekettik qyzmetterdiń barlyq 43 túri elektrondy túrde kórsetiletin bolady. A.Kárimov anyqtaǵandaı, bul - qyzmetterdi qoldanýdyń balamaly túri ǵana, olardy quzyrly organdarǵa baryp, ne bolmasa Halyqqa qyzmet kórsetý ortalyqtarynan alý múmkindigi qoldanysta qala beredi.
Portaldyń qyzmetteri salyqtyq tólemderdi qajet etpeıtin qyzmetter túrine - tegin jáne ol aptanyń barlyq kúninde táýligine 24 saǵat boıy qoljetimdi. Jańa júıeniń eki qaýipsizdik deńgeıi bar, bul - veb-portalǵa qosylý arnasynyń qorǵalýy jáne jeke sáıkestendirý nómiri (JSN) arqyly beriletin tapsyrysty qosymsha rastaýǵa arnalǵan elektrondyq sandyq qoltańba. Elektrondyq sandyq qoltańbany elektrondy úkimettiń saıtynan, sondaı-aq HQO-dan alýǵa bolady.
Ákimdik ókili málim etkendeı, joba bir jyl boıy ázirlendi. Onyń jalpy quny - 30 mln. teńge.
