Astana ákimdigi azyq-túlik baǵasyn turaqtandyrýǵa arnalǵan «aınalym» shemasyna 14 mlrd teńge bóldi

ASTANA. QazAqparat – Astana ákimdigi azyq-túlik baǵasyn turaqtandyrýǵa arnalǵan «aınalym» shemasyna 14 mlrd teńge bóldi. Bul jóninde qalalyq ınvestıtsııalar jáne kásipkerlikti damytý basqarmasy basshysynyń orynbasary Maqsat Jańabaev baspasóz konferentsııada aıtty, dep habarlaıdy QazAqparat tilshisi.

«Jalpy ınvestıtsııalyq somasy 9,8 mlrd teńge bolatyn 2 bazar salynyp jatyr. Budan bólek aınalym mehanızmi qolǵa alynǵan. Onyń aıasynda bıýdjetten 14 mlrd teńge bólindi. Áleýmettik mańyzy bar taýarlardyń 19 túri boıynsha 35 myń tonna kóleminde kelisimshart jasaldy. Qoldanystaǵy sharttar boıynsha búgingi tańda 10 myń tonna kókónis qory bar. Bul kólem qalany qamtamasyz etý úshin jetkilikti», - dedi basqarma basshysynyń orynbasary.

Ákimdik ókili qala turǵyndarynyń qantqa degen suranysy qalaı qanaǵattandyrylatynyn da aıtty.

«Elordany qantpen qamtamasyz etý úshin Merki zaýytymen (Jambyl oblysy – red.) kólemi 3,5 tonna qant jetkizý shartyna qol qoıyldy. Sondaı-aq, Azyq-túlik korporatsııasy arqyly birinshi suryptaǵy undy arzandatylǵan baǵamen jetkizý úshin 5300 tonna astyq jetkizý týraly memorandým jasaldy.

Jármeńkeler turaqty ótip keledi. Onyń biri Saýran-7, ekinshisi Qosshyǵululy-14 mekenjaıy boıynsha ornalasqan. Óńirlik taýar óndirýshiler usynatyn ónimderdiń bári naryq baǵasynan 10-15 paıyz arzanǵa satylyp jatyr», - dedi Maqsat Jańabaev.