Astana ákimdigi «Astanadaǵy demalystar» týrıstik baǵdarlamasyn iske qosty
ASTANA. 7 maýsym. QazAqparat - Astana qalasynyń ákimdigi «Eır Astana» áýe kompanııasymen jáne elorda qonaqúılerimen birlesip ishki týrızmdi damytý maqsatynda «Astanadaǵy demalystar» týrıstik toptamasyn jasaqtady.
«Búgingi tańda Qazaqstandaǵy ishki týrızmdi damytý maqsatynda biz «Eır Astana» áýe kompanııasymen jáne osy baǵdarlamaǵa qatysqan Astana qalasynyń qonaqúılerimen birlesip «Astanadaǵy demalystar» dep atalatyn týrıstik toptamany usynamyz», - dep habarlady beısenbi kúni Astana qalasynyń kásipkerlik jáne ónerkásip basqarmasynyń bastyǵy Málıka Bekturova «Saryarqa» aýdanyndaǵy HQO-da ótken «Bıznestiń jol kartasy» baǵdarlamasy boıynsha keńestik qyzmetterdiń tusaýkeserinde.
Elorda ákimdiginiń málimetinshe, týrıstik toptama týrıster úshin elordanyń iri qonaqúılerinde turýǵa, ondaǵy qosymsha qyzmetterge 40 paıyzǵa deıin jeńildikter alýǵa, sondaı-aq QR Tuńǵysh Prezıdentiniń Mýzeıi, «Dýman» oıyn-saýyq ortalyǵyndaǵy muhıtaral nemese «Atameken» Qazaqstan kartasy» etnomemorıaldyq kesheni syndy qaladaǵy úsh mádenı keshenniń birine tegin barýǵa múmkindik beredi.
Baǵdarlamaǵa qatysý úshin «Eır Astana» áýe kompanııasynyń satý keńselerinen Astana baǵytyndaǵy kez-kelgen reıske ushý ýaqytynan keminde 14 kún buryn bılet alyp, qonaqúıde kelý ýaqytynan keminde 7 kún buryn oryn saqtap qoıý qajet.
Jeńildikter alý úshin «Astanadaǵy demalystar» týrıstik toptamasynyń búkteme qaǵazyndaǵy kýpondy toltyryp, áýe bıletin alǵan kezde áýekompanııa ókilderine mór bastyryp alý kerek. Osydan soń ózdiginen qonaqúımen habarlasyp, onda kirgen mezette jáne ekskýrsııalyq nysandy aralaý kezinde jeńildik kýponyn kórsetý qajet.
«Bul ishki týrızmniń damýyna septigin tıgizedi, al qazaqstandyqtar jazǵy demalysyn josparlaý kezinde osy týrıstik toptamany eskeredi dep úmittenemiz», - dep atap ótti M.Bekturova.
