Astana ákimdigi árbir qańǵybasqa kúnine 2,3 myń teńge shyǵyndaıdy
ASTANA. QazAqparat - Astana qalasynyń ákimdigi turǵylyqty mekenjaıy joq árbir adamǵa kúnine 2 388,75 teńge shyǵyndaıdy. Bul týraly «QazAqparat» Halyqaralyq aqparat agenttiginiń resmı saýalyna jaýap bergen Jumyspen qamtý, eńbek jáne áleýmettik qorǵaý basqarmasy basshysynyń orynbasary Sáýle Nurǵojına málim etti.
«2016 jyly belgili turaǵy joq adamdar sanyn azaıtý maqsatynda 100 qyzmet alýshyǵa jeke basyn kýálandyratyn qujattaryn qalpyna keltirýge járdem kórsetildi, onyń ishinde 12 qyzmet alýshyǵa 1974 jylǵy úlgidegi pasportty QR azamatynyń jeke kýáligine aýystyrý júrgizildi. Tórt adamǵa jumysqa ornalasýǵa járdem kórsetildi. Jeti adamǵa múgedektik top rásimdeldi, 16 adam «Sharapat» jáne «Qamqor» áleýmettik qyzmet kórsetý ortalyqtaryna joldandy», - dep atap ótti ol.
Sondaı-aq, onyń sózine qaraǵanda, 300 adamǵa úıge oralýǵa múmkindik jasaldy. Olardyń ishinde 56 kisige bılet satyp alyndy, jeke jetkizýshilermen kelisý arqyly 71 adam úılerine jetkizilgen, 172-si otbasylarymen qaıta qaýyshty. 2016 jyly alǵashqy medıtsınalyq kómekti 1397 adam aldy.
Byltyr áleýmettik beıimdeý ortalyǵyna kelgen adamdarmen qoǵamǵa qaıta beıimdeý jóninde 1366 kelisim jasaldy. Qazirgi ýaqytta 1366 kelisimniń 788-i oryndaldy, 192 kelisim 2017 jyly júzege asady dep kútilýde.
