Astana ákimdigi aldyndaǵy avtoturaqqa qarapaıym azamattar da kóligin qoıa alady
ASTANA. QazAqparat - Jýyq arada qyzmettik kólikterden tazartylatyn Astana qalasy ákimdigi ǵımaratynyń aldyndaǵy avtoturaqqa qarapaıym azamattar da kóligin qoıa alatyn boldy, dep habarlaıdy QazAqparat tilshisi.
«Iá, kireberiste qyzmettik kólikterdiń turmaýy týraly ákimniń tapsyrmasy bar. Avtoturaq ashyq bolady», - dedi elorda ákimdiginiń baspasóz ortalyǵynda ótken brıfıngte Astana qalalyq ortany regeneratsııalaý basqarmasynyń basshysy Ǵanı Isqalıev.
Onyń aıtýynsha, avtoturaq tolyǵymen ashyq bolý úshin ýaqyt kerek.
«Bul belgili bir ýaqytty qajet etetini aıqyn, sebebi biz taksıge 18 basqarma men ákim apparatyn aýystyryp jatyrmyz. Avtoturaqqa tolyp turǵan kólikterdiń barlyǵy, álbette, atalǵan basqarmalarǵa ǵana tıesili emes. Munda vedomstvoǵa qarasty uıymdar men ózge memlekettik organdar az emes. Atalǵan uıym qyzmetkerlerin de taksıge otyrǵyzý týraly ákimniń tapsyrmasy bar. Demek, biz barlyǵyn da taksılerge aýystyrǵan kezde avtoturaqtyń oryny bosap qalady», - deıdi Ǵanı Isqalıev.
Eske sala ketsek, buǵan deıin Astana ákimdiginiń 2018 jyldan bastap, taksı qoldaný boıynsha pılottyq jobaǵa aýysatyny habarlanǵan edi. Osy jyldyń qyrkúıek aıynda qala ákimdik qyzmettik kólikterden bas tartqaly otyr.
