Astana ákimdigi «Ábý-Dabı Plaza» jumysshylaryn dalada qaldyrmaýǵa ýáde berdi
ASTANA. QazAqparat - «Ábý-Dabı Plaza» qurylys nysanynan jumystan shyǵarylǵandar dalada qalmaıdy. Bul týraly búgin Astana qalalyq jumyspen qamtý, eńbek jáne áleýmettik qorǵaý basqarmasynyń basshysy Ermek Ospanov aıtty, dep habarlaıdy QazAqparat.
«Azamattarymyzdy dalada qaldyrmaımyz, kóńilderin oryndaryna keltiremiz. Tek Arabtec («Ábý-Dabı Plaza» nysanyn salyp jatqan kompanııa) emes basqa da kompanııalar bar. Biz ınvestıtsııalyq tartymdy qalamyz jáne solaı bolyp qalýǵa da tıispiz. Qalany damytýymyz qajet. Ol úshin ınvestorlardy shaqyryp, olarǵa jaıly jaǵdaı jasaǵanmen, Qazaqstan azamattaryna, bizdiń qyzmetkerlerimizge nuqsan keltirmeýimiz kerek», - dedi basqarma basshysy.
Ermek Ospanov elordada aıaqsyz qalǵan úleskerlik qurylys nysandaryn salýmen aınalysatyn jańa uıym qurylatyndyǵyn jáne oǵan «Ábý-Dabı Plaza» qurylys nysanynan jumystan shyǵarylǵandardy qabyldaýǵa bolatynyn aıtty.
«Qazir bizde problemaly nysandardy salýmen aınalysatyn jańa uıym qurylatyn bolady. Barlyq qurylysshylardy shaqyramyz. Kóp nysan bar. Munan bólek, qalanyń ulǵaıa túsýine baılanysty mektepter, balabaqshalar men aýrýhanalar salynady. Memlekettik-jekeshelik áriptestik aıasynda da kóptegen nysan boı kóteredi. Biz olarǵa da jumysqa ornalastyrýǵa daıynbyz», - dedi ol.
Jalpy onyń aıtýynsha, Astanada 6,5 myń bos jumys orny bar. Onyń 200-i qurylys mamandyqtary boıynsha. Elordada bos jumystaryn «Jumyspen qamtý ortalyǵy» mobıldi qosymshasy arqyly da izdeýge bolady.
