Astana ákimdigi 30 mlrd teńgege jýyq bıýdjet qarajatyn únemdedi

ASTANA. QazAqparat - 2018 jyly Astana qalasynyń ákimdigi transformatsııalaý júıesi arqyly 27,6 mlrd teńge bıýdjet qarjysyn únemdedi, dep habarlaıdy QazAqparat tilshisi.

Bul týraly elorda ákimi Baqyt Sultanov Memlekettik qyzmet isteri jáne sybaılas jemqorlyqqa qarsy is-qımyl agenttigi Alqasynyń keńeıtilgen otyrysynda aıtty.

Ákim Elbasynyń memlekettik basqarýdyń tıimdi tetigin qurý jónindegi tapsyrmasyn oryndaý úshin qurylymdyq bólimshelerge muqııat fýnktsıonaldyq taldaý júrgizgenin atap ótti. Sonyń nátıjesinde ákimdikte transformatsııa júrgizilip, bıznes-protsesterdi ońtaılandyrý jáne memlekettik qyzmetti tsıfrlandyrý sharalary qabyldanǵan.

«2018 jyldyń qorytyndysy boıynsha basqarý personalyn qysqartý arqyly - 151 mln teńge, vedomstvolyq kólikten bas tartyp, taksomotorlyq qyzmet kórsetý arqyly - 163,5 mln teńge, jobalardy qarjylandyrý shartyn qaıta qaraýdan - 3,3 mlrd teńge, jańa densaýlyq saqtaý nysandaryn salýdan bas tartyp, servıstik modelge kóshý arqyly («Jaǵalaý» nysany boıynsha) - 1,9 mlrld teńge jáne memlekettik satyp alýda 22,1 mlrd teńge únemdeldi. Jalpy alǵanda, 2018 jyly 27,6 mlrd teńge únemdeldi jáne qyzmet kórsetý úshin kommýnaldyq menshikke 200 mlrd teńgeden asatyn nysan qabyldandy. 2023 jylǵa deıin memlekettik satyp alýlardy qospaǵanda, shamamen 26,4 mlrd teńge únemdelýi tıis jáne qyzmet kórsetý úshin 400 mlrd teńgege nysan qabyldanady», - dedi qala basshysy.

Onyń aıtýynsha, sońǵy 10 jylda Astana halqy eki esege ósti, al ákimdiktiń shtattyq sany 10 protsentke qysqardy. Elordada bir ákimdik qyzmetkerine 1275 turǵynnan keledi. Bul kórsetkish ózge óńirlermen salystyrǵanda 4 esege kóp.