Astana ákimdigi 2008-2010 jyldarǵa arnalǵan Memlekettik turǵyn úı baǵdarlamasy boıynsha alǵashqy qonys toı ıeleriniń tizimin jarııalady
ASTANA. Tamyzdyń 23-i. QazAqparat /Janna Qorqytova/ - Astana ákimdigi óz resmı saıtynla 2008-2010 jyldarǵa arnalǵan Memlekettik turǵyn úı baǵdarlamasy boıynsha alǵashqy qonys toı ıeleriniń tizimin jarııalady.
Osy baǵdarlamany júzege asyrýdyń aıasynda shildeniń 23-i men tamyzdyń 5-i kúnderi turǵyn úı komıssııasynyń májilisteri ótip, onda «bala-shaǵasy bar jas otbasy», «memlekettik qyzmetkerler», «memlekettik kásiporyndardyń qyzmetkerleri» jáne «memlekettik mekemelerdiń memlekettik emes qyzmetkerleri» sanattary boıynsha salynyp bitken úılerden baspana alatyndardyń tizimderin bekitti. Osylaısha, búgingi tańda komıssııa 1372 jańa qonys ıelerin bekitti.
«Turǵyn úı komıssııasy baspanany ótinish berýshilerdiń eńbek ótilderi boıynsha jınaǵan baldary men jas otbasylardyń bala sandary boıynsha jınalǵan baldardyń sany boıynsha úlestirdi», delingen ákimdiktiń aqparatynda.
Ótinish berýshiler, bekitilgen tizim boıynsha, satý-satyp alý sharttaryna otyrý úshin Astana qalalyq turǵyn úı basqarmasyna shaqyrylady.
Saıtta, sondaı-aq qalǵan úılerdiń qurylystary bitken soń birtindep ótkiziletin turǵyn úı komıssııasynyń otyrystarynda kelesi 4240 ótinish ıeleriniń páterlerin úlestirý josparlanyp otyrǵany atap kórsetilgen.
