Astana ákimdigi 1 jeltoqsanda jańa týylǵan sábılerge syılyqtar tartý etedi

ASTANA. QazAqparat - Elordada QR Tuńǵysh Prezıdenti kúnin merekeleý aıasynda bosanatyn áıelderge dárigerlik járdem beretin mekemeler analarǵa jáne jańa týǵan sábılerge syılyqtar men kádesyılar beredi, dep habarlady astana.gov.kz.

Aıta keteıik, ótken jyly 1 jeltoqsanda - QR Tuńǵysh Prezıdenti kúni Astanada 50 sábı, sonyń ishinde 25 ul men 25 qyz dúnıege keldi. Jalpy, byltyr 71 balaǵa Memleket basshysynyń qurmetine Nursultan esimi berilgen.

Elordalyq Densaýlyq saqtaý basqarmasynyń habarlaýynsha, qazirgi kezde perzenthanalar qaýipsiz ana qaǵıdaty boıynsha jumys isteıdi. «Qaýipsiz ana» qaǵıdaty - júkti áıeldi únemi baqylaýda ustaý jáne qaýipsiz bosaný jaǵdaıynyń júıesi, alǵashqy shuǵyl kómek kórsetý. Dúnıejúzilik densaýlyq saqtaý uıymynyń baǵdarlamasy boıynsha qaýipsiz ana qaǵıdatyna sáıkes, bosanatyn áıelderge dárigerlik járdem beretin mekemelerde júktilikti baqylaý men bosanýdyń jańa jáne tıimdi tehnologııalary engizildi.