Astana AI Film Festival-ge 17 kúnde 50 elden 300-den astam ótinim tústi
ASTANA. KAZINFORM — Jasandy ıntellekt kómegimen túsirilgen halyqaralyq fılmder festıvali — Astana AI Film Festival (AAIFF 2026) ótinim qabyldaýdy jalǵastyryp jatyr. Qatysýshylardy tirkeýdiń aıaqtalýyna 65 kún qaldy.
Ótinim qabyldaý bastalǵannan keıingi nebəri 17 kún ishinde uıymdastyrýshylar əlemniń 50 elinen 300-den astam jumys qabyldady. Onyń ishinde ótinimderdiń 86%-y sheteldik qatysýshylardan kelip túsken.
— Eń kóp ótinim Qazaqstan, Reseı, AQSh, Ońtústik Koreıa jəne Qytaı elderinen joldandy. Sonymen qatar qatysýshylar qatarynda Ulybrıtanııa, Nıderland, Italııa, Indonezııa, Ispanııa, Mysyr, Úndistan, Argentına, Ýkraına, Túrkııa, Sıngapýr, Pəkistan, Majarstan, Chılı, Brazılııa, Bolgarııa, Birikken Arab Əmirlikteri, Germanııa, Japonııa, Frantsııa, Kanada, Aýstralııa jəne ózge de elderdiń ókilderi bar, — delingen habarlamada.
Uıymdastyrýshylardyń aıtýynsha, baıqaýǵa mundaı qyzyǵýshylyq AI arqyly jasalatyn kınonyń kreatıvti ındýstrııadaǵy jańa jahandyq baǵytqa aınalyp kele jatqanyn kórsetedi. Al Qazaqstan osy qozǵalysty damytýǵa arnalǵan mańyzdy alańdardyń birine aınalyp keledi.
— Qazirdiń ózinde jobaǵa degen qyzyǵýshylyqtyń Qazaqstan shekarasynan əldeqaıda asyp túskeni baıqalady. Ótinimder is júzinde barlyq qurlyqtan joldanǵan. Bul jasandy ıntellekt pen kınonyń jańa formattary əlemdik avtorlardy shyn məninde biriktire alatynyn dəleldeıdi, — dep atap ótti mamandar.
Buǵan deıin kreatıvti ındýstrııa ókilderimen kezdesý barysynda Qazaqstan Respýblıkasynyń Prezıdenti Qasym-Jomart Toqaev bul sharanyń kreatıvti ındýstrııanyń damýyndaǵy túbegeıli ózgeristerdi kórsetetin, əlemdik deńgeıdegi alǵashqy bastamalardyń biri bolatynyn atap ótti.
— Festıvaldi uıymdastyrý Qazaqstandy halyqaralyq arenadaǵy ınnovatsııalar men jasampaz bastamalar ortalyqtarynyń biri retinde kórsetý úshin óte mańyzdy, — dedi Memleket basshysy.
Eske salsaq, Astana AI Film Festival 2026 jylǵy 28 qyrkúıek pen 1 qazan aralyǵynda Astanada ótedi. Festıvaldiń basty oqıǵasy jalpy júlde qory 1 mıllıon AQSh dollaryn quraıtyn halyqaralyq qysqametrajdy AI-fılmder baıqaýy bolmaq. Negizgi baıqaý maýsymynyń taqyryby: «The Future Worth Living In» («Ómir súrýge turarlyq bolashaq»).
Sonymen qatar bes nomınatsııadan turatyn ashyq sektsııa qarastyrylǵan: úzdik rejıssýra, úzdik vızýaldy sheshim, úzdik oqıǵa, úzdik tujyrymdama jəne úzdik keıipker. Astana AI Film Festival festıvaline ótinim qabyldaý 2026 jylǵy 15 tamyzǵa deıin jalǵasady.
