Astana AI Film Festival fınalısteri festıval týraly áserlerimen bólisti
ASTANA. KAZINFORM — Astanada ótken alǵashqy halyqaralyq jasandy ıntellekt festıvali — AAIFF 2026 fınalısteri sharadan alǵan áserlerin aıtyp, festıvalge taǵy da qatysýǵa nıetti ekenin jetkizdi, dep habarlaıdy Kazinform tilshisi.
Argentınadan kelgen AAIFF fınalısi Gabrıel Bosızıo (Gabriel Bosisio) storıtellıngtiń mádenı áleýeti men oqıǵalardyń adamdardy shekaralarǵa qaramastan biriktire alatynyn atap ótti. Onyń aıtýynsha, ózi kompıýter kómegimen jasaǵan jumystyń Astana jastarynyń kóńilinen shyqqanyn kórý erekshe áser qaldyrǵan.
— Jasandy ıntellekt storıtellıng arqyly kóptegen kedergini joıýǵa qabiletti, — dedi ol.
Argentınalyq fınalıst jasandy ıntellekttiń damýyn kınokameranyń paıda bolýymen salystyryp, ony kınematografııanyń bolashaǵyna kútpegen ózgerister ákelýi múmkin jańa tehnologııa dep atady.
Al Ońtústik Koreıadan kelgen Astana AI Film Festival fınalısi Kan Dehen (Kang Daehyeong) bastapqyda óz ıdeıasyn qatysýshylar sany kóp baıqaýdan ótkize alatynyna kúmándanǵanyn aıtty. Sondyqtan fınalǵa shyǵýy ol úshin kútpegen jaǵdaı ári úlken mártebe bolǵan.
— Alǵash ret ótinim berip, tirkelgen kezde qatysýshylardyń sanyn kórip, «Meniń de qolymnan kele me?» dep oıladym. Bolashaqta qaıtadan festıvalge qatysý úshin osynda kelýge múmkindik bolsa, bul keremet bolar edi. Eger kelesi maýsym ótse, mindetti túrde taǵy da ótinim beremin, — dedi Kan Dehen.
Ol aldaǵy festıvalderde kınoda jasandy ıntellektini qoldaný arqyly ashylatyn múmkindikterdi ári qaraı zertteı berýge úmit bildirdi.
Eske salaıyq, Memleket basshysy Astana AI Film Festival jasandy ıntellekt qoldanǵan fılmderdiń birinshi halyqaralyq baıqaýynda sóz sóılep, atalǵan festıvaldiń ereksheligin atap ótti.
Astanada Astana AI Film Festival (AAIFF 2026) aıaqtaldy. Jasandy ıntellekt kómegimen jasalǵan fılmder festıvali 1-3 qazan aralyǵynda ótti. Bıyl baıqaýǵa álemniń 125 elinen 8 067 ótinim túsip, olardyń arasynan 25 jumys fınalǵa ótti.
Festıvaldiń jalpy júlde qory 2 mln dollardy qurady. Onyń jartysy júldege, qalǵan bóligi perspektıvaly AI-komandalardy qoldaýǵa jáne Qazaqstandaǵy óndiristi damytýǵa baǵyttaldy.
Qazaqstandyq avtor Myrzahan Jumahan Astana AI Film Festival festıvalinde «Úzdik keıipker» nomınatsııasynda jeńiske jetti. Halyqaralyq qazylar alqasy onyń «It Was Just a Joke» («Bul jaı ǵana ázil edi») komedııasyn joǵary baǵalady.
Astana AI Film Festival jeńimpazdarynyń biri ıtalııalyq avtor ıAkopo Reale óziniń jetistik joly jaıynda aıtyp berdi.
Al Astana AI Film Festival jeńimpazy Nıkolaı Shestaktyń (Latvııa) Astanadaǵy halyqaralyq kınofestıvali óziniń ónerin barsha álemge tanytýǵa múmkindik bergenin aıtty.
