Astana AI Film Festival baıqaýyna 125 elden 8 myńnan astam jumys tústi
ASTANA. KAZINFORM — Astana AI Film Festival halyqaralyq baıqaýyna bıyl álemniń 125 elinen 8 067 jumys tústi. Festıval 1–3 qazan kúnderi Astanada ótedi.
Ótinish qabyldaý 7 qyrkúıekte aıaqtaldy. Baıqaýǵa 4 756 avtor qatysqan.
Eń kóp jumys AQSh-tan tústi — 1 395. Qazaqstan 829 jumyspen ótinim sany boıynsha ekinshi orynda tur. Úndistannan 702, Qytaıdan 550, Ońtústik Koreıadan 349 joba usynylǵan. Ótinim sany boıynsha alǵashqy ondyqqa Ulybrıtanııa, Indonezııa, Japonııa, Brazılııa jáne Frantsııa da endi.
Baıqaýdyń negizgi taqyryby — The Future Worth Living In («Ómir súrýge turarlyq bolashaq»). Osy taqyryp boıynsha 3 138 fılm usynyldy. Bul — barlyq jumystyń shamamen 40 paıyzy. Taqyryptyq shekteýi joq ashyq baǵdarlamaǵa 4 929 jumys túsken.
Fılmder baıqaýǵa arnaıy ázirlengen. Avtorlar jasandy ıntellekt múmkindigin paıdalanyp, janr, dramatýrgııa men kórkemdik til turǵysynan túrli tásildi synap kórgen. Jalpy baıqaý baǵdarlamasy 19 janrdy qamtıdy.
— Osydan birneshe aı buryn ǵana halyqaralyq baıqaýdy bastaǵan edik. Búginde 125 elden 8 myńnan astam jumys qabyldap otyrmyz. Bular — jasandy ıntellekt múmkindigin synaý úshin jasalǵan jekelegen tájirıbeler emes, kúrdeli oqıǵasy, keıipkerleri men tutas kıno álemi bar tolyqqandy fılmder. Mundaı aýqym AI-kınonyń qanshalyqty jyldam damyp kele jatqanyn kórsetedi, — dedi festıvaldiń teń quryltaıshysy ári AAIFF keńesiniń tóraǵasy Almas Jalı.
Festıvaldiń júlde qory — 1 mln dollar. Onyń 750 myń dollary negizgi taqyryptaǵy úzdik jumystarǵa beriledi. Qalǵan 250 myń dollar ashyq baǵdarlamadaǵy «Úzdik keıipker», «Úzdik rejıssýra», «Úzdik vızýaldy til», «Úzdik oqıǵa» jáne «Úzdik kontseptsııa» atalymdaryna bólinedi.
Budan bólek, áleýeti joǵary AI-komandalarǵa 1 mln dollar ınvestıtsııa qarastyrylǵan. Bul qarjyny kásipker ári ınvestor Baladjı Srınıvasan usyndy.
— Biz myqty jobalardyń festıval aıaqtalǵannan keıin de jalǵasyn tapqanyn qalaımyz. Sondyqtan júlde qorynan bólek, ınvestıtsııa qarastyryldy. Bul avtorlarǵa óndiristi jalǵastyrýǵa, jobalaryn keńeıtip, Qazaqstanda odan ári damytýǵa múmkindik beredi. Osy maqsatta iriktelgen komandalar Astana Hub qatysýshysy atana alady, — dedi AAIFF teń quryltaıshysy ári kreatıvti dırektory Aızat Qusaıynov.
Osylaısha, júlde qory men ınvestıtsııanyń jalpy kólemi 2 mln dollardy quraıdy.
Fılmderdi halyqaralyq qazylar alqasy baǵalaıdy. Onyń quramynda ıÝNESKO-nyń burynǵy bas dırektory ári Frantsııanyń burynǵy mádenıet mınıstri Odrı Azýle, China Film Group janyndaǵy Jasandy ıntellekt zertteý ınstıtýtynyń dekany Ma Pın, Beıjiń kınoakademııasy Anımatsııa fakýlteti dekanynyń orynbasary Van Hao, kásipker ári ınvestor Baladjı Srınıvasan jáne BytePlus ókili bar.
Fınalǵa shyqqan fılmder Chaplin kınoteatrlarynyń úlken ekrandarynda kórsetiledi. Festıval baǵdarlamasynda pikirtalastar, sheberlik sabaqtary men marapattaý rásimi de bar. Baıqaý jeńimpazdary 3 qazanda belgili bolady.
Buǵan deıin Astana AI Film Festival baıqaýyna 90-nan astam eldiń ókilderi qatysýǵa nıet bildirgenin jazǵan edik.
