Astana AI Week: Qazaqstan tsıfrlyq memleket qurýǵa qandaı qadam jasap jatyr
ASTANA. KAZINFORM — Qazaqstanda jasandy ıntellektini damytý strategııasy qabyldandy. Aldaǵy úsh jylda eldi tsıfrlyq memleketke aınaldyrý úshin zańnamany jetildirý, ınfraqurylymdy damytý jáne kadr daıarlaý baǵytyndaǵy jumystar jalǵasady. Bul týraly Astana AI Week forýmynda Jasandy ıntellekt jáne tsıfrlyq damý vıtse-mınıstri Ǵızzat Baıtursynov aıtty.
Onyń sózinshe, búginde jasandy ıntellekt ekonomıkalyq ósim men eldiń básekege qabilettigin aıqyndaıtyn negizgi baǵyttardyń birine aınalyp otyr.
— Memleket basshysy aldaǵy úsh jyl ishinde Qazaqstandy tsıfrlyq memleketke aınaldyrý jóninde naqty mindet qoıdy. Osy tapsyrmany iske asyrý úshin jaqynda Jasandy ıntellektini damytý strategııasy qabyldandy. Bul qujat elimizdiń tsıfrlyq transformatsııasynyń negizgi baǵyttaryn aıqyndaıdy, — dedi Ǵızzat Baıtursynov.
Vıtse-mınıstrdiń aıtýynsha, keıingi bir jyldan astam ýaqyt ishinde osy saladaǵy quqyqtyq baza qalyptasty. Atap aıtqanda, Tsıfrlyq kodeks, Jasandy ıntellekt týraly zań jáne tehnologııalyq saıasatty damytý baǵdarlamasy qabyldanǵan.
Kelesi kezeńde álemdik deńgeıdegi tsıfrlyq ınfraqurylymdy damytýǵa basymdyq beriledi.
— Osy baǵyttaǵy mańyzdy jobalardyń biri — Qazaqstanda iri derekterdi óńdeý ortalyǵyn salý. Bul joba amerıkalyq ınvestıtsııalyq kompanııalarmen birlesip júzege asyrylady. Ortalyqta zamanaýı esepteý qýattary men sýperkompıýterler ornalastyrylyp, jasandy ıntellekt modelderin ázirleýge qajetti ınfraqurylym qalyptastyrylady, — dedi ol.
Ǵızzat Baıtursynovtyń aıtýynsha, elimizde AI Alem ortalyǵy da qurylyp jatyr. Ol memlekettik organdardy, joǵary oqý oryndaryn, startaptardy jáne bıznes qaýymdastyqty biriktiretin ekojúıege aınalmaq.
Sonymen qatar jasandy ıntellekt salasyna qajetti mamandardy daıarlaý jumystary kúsheıtilýde. Bilim berý baǵdarlamalary mektepten bastap joǵary oqý oryndaryna deıin kezeń-kezeńimen engizilip jatyr.
Vıtse-mınıstrdiń sózinshe, Qazaqstan halyqaralyq yntymaqtastyqty da keńeıtýdi kózdeıdi. Bıyl tamyz aıynda Astanada jasandy ıntellekt boıynsha halyqaralyq olımpıada ótip, oǵan 50-den astam eldiń oqýshylary qatysady dep josparlanyp otyr.
— Bizdiń maqsatymyz — jasandy ıntellektini tek jańa tehnologııa retinde emes, azamattardyń ómir sapasyn jaqsartatyn jáne ekonomıkanyń damýyna serpin beretin naqty quralǵa aınaldyrý, — dedi Ǵızzat Baıtursynov.
Aıta keteıik, búgin elordadaǵy Alem.ai halyqaralyq jasandy ıntellekt ortalyǵynda Astana AI Week 2026 aptalyǵy bastaldy. Úsh kúnge sozylatyn is-shara ǵylym, tehnologııa, bıznes pen memlekettik sektor ókilderin bir alańǵa jınap, jasandy ıntellekt salasyndaǵy jańa sheshimderdi talqylaýǵa múmkindik beredi.
