Astana AI Film Festival: 90-nan astam eldiń ókilderi AI-fılm baıqaýyna qatysady

Jıyn barysynda festıvaldiń baıqaý baǵdarlamasy, ony Astana Digital Bridge halyqaralyq forýmy aıasynda ótkizý jáne qatysýshylar men qonaqtardy qabyldaýǵa daıyndyq máseleleri qaraldy.

Otyrysqa qamqorshylyq keńesiniń músheleri Qýanyshbek Esekeev pen Raýshan Qajybaeva, Premer-mınıstrdiń orynbasary – jasandy ıntellekt jáne tsıfrlyq damý mınıstri Jaslan Mádıev, UNI-Q Group medıaholdınginiń tóraǵasy Muhamedqalı Taýan, sondaı-aq festıval uıymdastyrýshylary Almas Jalı men Aızatýlla Hýsseın qatysty.

Uıymdastyrýshylardyń málimetinshe, festıvalge álemniń 90-nan astam elinen 1900-den astam ótinim kelip túsken. Eń kóp ótinim AQSh-tan (17%), Úndistannan (10%) jáne Qazaqstannan (8%) joldanǵan. Sondaı-aq Ońtústik Koreıa men Qytaıdan – 5 paıyzdan, Ulybrıtanııadan – 4 paıyz, Reseı men Gonkongtan 3 paıyzdan ótinim qabyldanǵan.

Jıynda Memleket basshysy Qasym-Jomart Toqaevtyń 2026 jyldy Tsıfrlandyrý jáne jasandy ıntellekt jyly dep jarııalaǵany atap ótildi.

Uıymdastyrýshylardyń aıtýynsha, Astana AI Film Festival festıvalin ótkizý Qazaqstannyń jasandy ıntellekt salasyndaǵy halyqaralyq yntymaqtastyqty damytýǵa jáne osy baǵyttaǵy jahandyq úderisterge belsendi qatysýyna múmkindik beredi.

Festıvaldiń halyqaralyq qazylar alqasynyń quramyna ıÝNESKO-nyń burynǵy bas dırektory Odre Azýle, China Film Group ókili Ma Pın jáne Beıjiń kınoakademııasynyń professory Van Hao endi. Festıvaldiń bas seriktesi – Freedom Holding Corp.

Sonymen qatar jıynda Beıjińde ótken Qazaqstan–Qytaı AI-kıno salasyndaǵy ınnovatsııalyq almasý forýmy aıasynda Astana AI Film Festival qory men Beijing Zhongguancun Tongli Technology Service Co., Ltd. kompanııasy arasynda yntymaqtastyq týraly memorandýmǵa qol qoıylǵany aıtyldy. Kelisimge sáıkes, qytaılyq kompanııa festıvaldiń Qytaıdaǵy resmı ókili atandy.

Uıymdastyrýshylardyń pikirinshe, ótinimderdiń keń geografııasy jasandy ıntellekt negizindegi kıno óndirisine álemdik kásibı qaýymdastyqtyń qyzyǵýshylyǵy artyp kele jatqanyn kórsetedi. Búginde AI tehnologııalary fılm jasaý tásilderin ǵana emes, tutas kınoóndiris úderisin de ózgertip jatyr.

Astana AI Film Festival 2026 jylǵy 1-3 qazan aralyǵynda Astanada Astana AI Week aıasynda ótedi.

Festıval baǵdarlamasynda júlde qory 1 mln AQSh dollaryn quraıtyn halyqaralyq AI-fılmder baıqaýy, konferentsııa, jobalar pıtchıngi, ashyq kıno kórsetilimderi jáne jasandy ıntellekt, kıno ındýstrııasy men tsıfrlyq shyǵarmashylyq salasyndaǵy jetekshi sarapshylardyń qatysýymen ótetin kezdesýler qamtylǵan.

Baıqaýdyń negizgi taqyryby – «The Future Worth Living In» (Ómir súrýge laıyq bolashaq). Sonymen qatar bes nomınatsııa boıynsha ashyq sektsııa uıymdastyrylady. Festıvalge ótinim qabyldaý 2026 jyldyń tamyz aıynyń sońyna deıin jalǵasady.

Festıval aıasynda resmı baǵdarlamaǵa engen fılmder alǵash ret Astanadaǵy Chaplin kınoteatrynda úlken ekranda kórsetiledi. Al iskerlik baǵdarlama Digital Bridge forýmy aıasynda uıymdastyrylyp, plenarlyq jáne paneldik sessııalardy, vorkshoptar men halyqaralyq sarapshylardyń qatysýymen ótetin sheberlik sabaqtaryn qamtıdy.

Aıta keteıik, elimizde jasandy ıntellekt pen startapty damytý boıynsha halyqaralyq ınnovatsııalyq hab qurylady.