Astana aglomeratsııasynda 2 qalashyq qurylady
ASTANA. KAZINFORM – Astana aglomeratsııasynda 2 qalashyq qurylady. Bul týraly Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Mınıstrlik Astana qalasynyń jáne Aqmola oblysynyń ákimdikterimen birlesip, Astana aglomeratsııasyn damytýdyń 2024-2028 jyldarǵa arnalǵan keshendi josparynyń jobasyn ázirledi. Qazirgi ýaqytta Astana aglomeratsııasy aýmaǵyna Astana qalasy jáne oblys halqynyń 40 paıyzdan astamy turatyn Aqmola oblysynyń Qosshy qalasyn qosa alǵanda Arshaly, Tselınograd, Shortandy aýdandarynyń 46 eldi mekeni kiredi. Sońǵy 10 jylda Astana qalasynyń halqy 46 paıyzǵa ósti. Al boljamdy derekter boıynsha 2035 jylǵa qaraı 2,3 mln adamdy quraıdy. Aglomeratsııa eldi mekenderinen Astanaǵa kúndelikti maıatnıktik kóshi-qon 200 myńnan astam adamdy jáne 30 myń avtokólikti quraıdy», - dedi mınıstr.
Onyń atap ótýinshe, osyǵan baılanysty elorda ınfraqurylymynyń barlyq túrlerine júktemeniń ulǵaıýyna, qalanyń shet aımaqtarynyń keńeıýine, yńǵaıly kólik júıesiniń bolmaýyna jáne áleýmettik nysandar tapshylyǵyna alyp keletin birqatar problema bar.
«Joǵaryda aıtylǵan máselelerdi sheshý úshin ázirlengen keshendi josparda júıeli sharalar kózdelgen. Jalpy, qala qurylysyn damytýǵa, áleýmettik jáne ınjenerlik-kólik ınfraqurylymyn jańartýǵa, sondaı-aq ekologııalyq turaqtylyqty, qoǵamdyq qaýipsizdikti jáne tótenshe jaǵdaılardyń aldyn alýdy qamtamasyz etýge baǵyttalǵan jalpy somasy 1,13 trln teńgege 329 is-sharany iske asyrý kózdelgen. Aglomeratsııany aýmaqtyq damytý maqsatynda elorda men Aqmola oblysynyń damý josparlaryn úndestirýge múmkindik beretin biryńǵaı qala qurylysy saıasatyn ázirleý josparlanǵan. Sonymen qatar osy baǵytta aglomeratsııa quramyndaǵy eldi mekenderdiń ákimshilik shekaralaryn belgileý josparlanýda. Bul óz kezeginde qala mańy aımaǵyndaǵy jer qatynastaryn damytýǵa oń áser etedi. Jalpy aýdany 940 gektardan asatyn 2 qalashyq qurý kózdelip otyr. Olardyń aýmaǵynda shaǵyn bıznes júrgizýge arnalǵan úı-jaılary bar turǵyn úıler salynatyn bolady», - dedi Nurlan Baıbazarov.
