Astana aglomeratsııasy oǵan jaqyn ornalasqan eldi mekenderdiń damýyna serpin beredi
KÓKShETAÝ. QazAqparat - Astana aglomeratsııasy oǵan jaqyn ornalasqan eldi mekenderdiń damýyna serpin beredi. Bul týraly óńirlik kommýnıkatsııalar qyzmetinde ótken brıfıngte Tselınograd aýdanynyń ákimi Málǵajdar Tátkeev málim etti.
Aýdan əkiminiń sózinshe, ótken jyldyń qarasha aıynda Astana qalasy men Aqmola oblysy ákimdiginiń arasynda Elorda aglomeratsııasyn damytý boıynsha birikken jumystar týraly ekijaqty memorandýmǵa qol qoıyldy.
«Astana aglomeratsııasy quramyna ortalyǵy Astana qalasy men Aqmola oblysynyń 123 eldi mekeni enip otyr. Onyń ishinde Qosshy, Qoıandy, Talapker, Qaraótkel aýyldary sııaqty 7 eldi mekenmen birge 4 selolyq okrýg Tselınograd aýdanynda ornalasqan. Astana aglomeratsııasy Astana qalasyna jaqyn ornalasqan Tselınograd aýdanynyń damýyna serpin beretini sózsiz. Osy rette, aýdanymyzda jańa jumys oryndaryn kóptep ashyp, áleýmettik-mádenı ınfraqurylymdy damytý kózdelgen. Oǵan qosa, básekege qabiletti jáne turǵyndardyń ómir súrý sapasy joǵary kópfýnktsıonaldy aýmaq qurýǵa baǵyttalǵan», - dedi aýdan ákimi brıfıngte.
Sonymen qatar, Málǵajdar Tátkeev Astana aglomeratsııasyna kiretin eldi mekenderdi sapaly aýyz sýmen, elektrmen jáne jolmen qamtamasyz etý baǵytynda qolǵa alynǵan jobalarmen tanystyrdy. Bul baǵyttaǵy jumys elordamyzdyń 20 jyldyǵy qarsańynda aıryqsha ózekti bolyp otyr.
Spıker arnaıy slaıdtar arqyly Qosshy, Taıtóbe, Qoıandy, Talapker, Qajymuqan, Qaraótkel jáne Qarajar aýyldaryndaǵy qolǵa alynǵan isterge sıpattama berdi. Atalǵan eldi mekenderdiń barlyǵynda turǵyndar sany eselep artyp keledi. Bul umtylysty túsinýge bolady. Sondyqtan, atqarylǵan jáne josparlanǵan jumys aýqymy keńeıe túsýde. Memleket pen oblys basshylyǵynyń aglomeratsııalyq aımaqty damytý týraly kezeńdik josparynda belgilengen mindetter arnaıy kestege saı júzege asyrylýda. Barlyq aýyldarda bilim berý, densaýlyq saqtaý, mádenı-turmystyq nysandar jumys istep tur.
Qosshy kentinde, burynǵylaryna qosymsha, 1,8 mıllıard teńgeniń 200 shaqyrymdyq elektr jelisi tartyldy. Munyń qyzmetin 1216 abonent paıdalanýda. Aýyl turǵyndarynyń sany sońǵy 2-3 jylda eki ese ósip, 40 myń adamǵa jetýi 2010 jyly salynǵan 6 sý qaınarynyń qýatyn arttyrýdy talap etýde. Osyǵan oraı, jańa jobada 2 mıllıard teńgeniń 14 sý qaınaryn paıdalanýǵa kózdelgen.
Qoıandyda aýyl ishilik 154 shaqyrymdyq jol salynǵan. Qaraótkel aýylynda aglomeratsııalyq damýdyq keshendi josparyna sáıkes, quny 1,2 mıllıard teńgeniń elektr jelileri tartylyp, bıyl munda 280 oryndyq, Qarajar aýylynda 140 oryndyq balalar baqshasy paıdalanýǵa berilmek.
Aýdan ákimi Astana qalasymen yntymaqtastyq jaıyn aıta kelip, «EKSPO-2017» nysandaryndaǵy jabdyqtardy paıdalanýdyń múmkindigi týǵanyn atap ótti. Sondaı-aq, turǵyn úı qurylysy, kommýnıkatsııalar, jumyspen qamtý, úleskerler máselesi, Astananyń azyq-túlik beldeýin qamtamasyz etý, tabıǵı apattardyń aldyn alý jaıly keńinen baıandady.
