Astana aglomeratsııasy: Tselınograd aýdanynda 20-ǵa jýyq bilim mekemesi salyndy
KÓKShETAÝ. QazAqparat - Tselınograd aýdanynda sońǵy alty jylda 9 mektep pen 9 balabaqsha salyndy. Bul týraly aýdan ákimi Malǵajdar Tátkeev turǵyndar aldyndaǵy esep berý kezdesýinde aıtty, dep habarlaıdy QazAqparat tilshisi.
Aýdandyq mádenıet úıinde ótken kezdesýde aýdan ákimi baıandamasyn bastamas buryn, eń aldymen jınalǵandardy elimizdiń bas qalasy Astananyń 20 jyldyq jáne aýdannyń 90 jyldyq mereıtoıymen quttyqtady. Іrgedegi aýdannyń áleýmettik-ekonomıkalyq damýynda Astananyń úlesi zor. Aýdannnyń ınfraqurylymy men kóliktik logıstıkasynyń damýyna, jańa óndiris oryndary men jumys oryndarynyń ashylýyna, turǵyndar sanynyń kún sanap artýy men turǵyn úı qurylysynyń qarqyn alýyna elorda úlken yqpal etýde.
Aýdan ákiminiń sózinshe, aýdanda ındýstrııalandyrý kartasy jobalaryn júzege asyrý esebinen ónerkásip jedel damyp keledi. Máselen, 2017 jyly ındýstrııalandyrý kartasyna eki joba engizilgen. Onyń biri Qosshy aýylyndaǵy quny 580 mıllıon teńge bolatyn «DD 21 Akmol» seriktestiginiń jıhaz tsehy bolsa, ekinshisi «Qumtas AKK» seriktestiginiń quny 250 mıllıon teńgeni quraıtyn beton zaýyty. Qazirgi kezde, bul jobalar oblystyq óńirlik úılestirý keńesiniń qaraýynda.
Aýyl sharýashylyǵyn damytý sharalary da oıdaǵydaı júzege asyrylýda. Osynyń arqasynda aýyl sharýashylyǵy ónimderiniń kólemi 27,5 mıllıard teńgeni qurady. Bul aldyńǵy jylmen salystyrǵanda 15,7 paıyzǵa ósip otyr. Ótken jyldyń kúzinde aýdan dıqandary 187,7 myń tonna astyq aldy. Sonymen qatar, aýdanda mal basy artqany baıqalady. Aýdan boıynsha ótken jyly 22,8 myń tonna et, 33,5 myń tonna sút jáne 38,7 mıllıon dana jumyrtqa óndirildi.
"Eń batysy, aýdanda Astananyń aınalasyndaǵy azyq-túlik beldeýin damytýda oń kórsetkishterge qol jetkizilip otyr", - dedi ol.
Sonymen qatar, ákimniń esebinde aıtylǵandaı, aýdanda shaǵyn jáne orta bıznesti damytý úshin de jaqsy jaǵdaı jasalǵan. Sapaly bilim men medıtsınalyq qyzmet kórsetýdi qamtamasyz etetin áleýmettik ınfraqurylymdardyń jaǵdaıyn jaqsartý boıynsha sharalar qoldanýda. Ásirese, bilim berý salasyna aýdanda ádettegideı erekshe kóńil bólinedi. Osy oraıda, aýdan ákimi mektepke deıingi oqý-tárbıe jelisin keńeıtý baǵytynda biraz sharýalar atqarylǵanyn atap ótti. Buǵan qatysty Memleket basshysy 2019 jylǵa deıin mektepaldy mekemelermen 100 paıyz qamtamasyz etý tapsyrmasyn bergen bolatyn. Osy maqsatta aýdan boıynsha sońǵy alty jylda 9 mektep jáne 9 balabaqsha salynǵan. Atap aıtqanda, Aqmol, Qaraótkel, Taıtóbe, №96 razezd, Qosshy, Qoıandy, Qyzylsýat, Qyzyljar, Orazaq, Talapker aýyldarynda bir-bir jańa mektepten turǵyzyldy. Aýdanda sońǵy 8 jylda oqýshylar sany 21 myńnan asyp, oblys ortalyǵyndaǵy mektepterdegi balalardyń sanyna jaqyndap qaldy. Aýdanda densaýlyq saqtaý salasynyń 50 nysany jumys isteıdi. Onyń 8-i sońǵy jeti jyl ishinde salynǵan.
Al turǵyn úı qurylysynda 145,6 myń sharshy metr baspana paıdalanýǵa berildi. Baspana salýda jyldyq jospar aldyńǵy jylmen salystyrǵanda 11,5 paıyzǵa nemese 694 jekemenshik turǵyn úıge asyra oryndaldy.
Aýdanda jol, ınjenerlik kommýnıkatsııa, elektr jelisi, sýmen qamtamasyz etý baǵytynda da aýqymdy sharýalar atqarylǵan. Máselen, sońǵy jeti jylda 22,3 shaqyrym jańa jol salynyp, 297,8 shaqyrymy jóndeldi. Sondaı-aq, 730 shaqyrym elektr jelisi, 700 shaqyrym sýmen jabdyqtaý jáne 141 shaqyrym sý aǵyzý jelisi salyndy.
