«Astana AEK» jeltoqsanǵa qate eseptelgen túbirtekterdi qaıta esepteýge ýáde berip otyr

ASTANA. QazAqparat – «Astana-AEK» basqarma tóraǵasynyń satý jónindegi orynbasary Ǵabıdolla Qojabaev jeltoqsan aıy úshin qate eseptelip ketken elektr aqysy tólemin avtomatty túrde qaıta esepteýge ýáde berdi, dep habarlaıdy QazAqparat tilshisi.

«Astana AEK» aktsıonerlik qoǵamynyń resmı málimeti boıynsha eki kásiporynnyń derekteri eki túrli bolýynan qate ketken.

«Astanaenergosbyt» JShS elektr qýatyn esepteý quralyndaǵy kórsetkishterdi 20-25 jeltoqsanda aldy. Al «Astana-AEK» 20-30 jeltoqsanda aldy. Sonyń saldarynan 2022 jyldyń jeltoqsan aıyndaǵy tólemaqy 30-25 kúntizbe kúnine shyǵyp ketken.

«Astanaenergosbyt» JShS keıbir tutynýshylardyń esepteý quralyndaǵy kórsetkishin shartty túrde esepke alǵan. «Astana-AEK»-ke kóshkennen keıin esepteý quralyndaǵy kórsetkishter naqty jaǵdaı boıynsha esepteldi», - delingen málimette.

Atalǵan aıyrmashylyqtar taldanyp, keıin artyq tólenip ketken soma aldaǵy aıdyń tólemderine aýdarylady. Bul másele boıynsha «Astana AEK» AQ-tiń Abaı kóshesi-80 mekenjaıyndaǵy keńsesinde tutynýshylarǵa 20 maman qyzmet kórsetedi.

Degenmen, Ǵabıdýlla Qojabaev atalǵan mekenjaıǵa barý mindetti emes ekenin aıtady.

«Biz «Astanaenergosbyt» kásipornymen birlesip, árbir shotty eki márte tekseremiz. Odan keıin «Astanaenergosbyttyń» derekteri bazasy negizinde úılerdi aralap, esepteý aspaptarynyń kórsetkishterin túsiremiz. Ol kórsetkishter «Astanaenergosbyttyń» bizge bergen kórsetkishterimen sáıkes kelmeı qaldy. Ondaǵy kórsetkishter az shyqqan. Al is júzinde kórsetkishter kóp bolyp tur. Sondyqtan biz esepke alynbaǵan kórsetkishter qosyp esepteımiz.

Tutynýshynyń kókeıinde suraq týyndaýy múmkin. Olar tólep qoıǵan bolsa, «Astanaenergosbyt» qaıta esepteýge daıyn. Biz esepteý muraǵatyn negizge alamyz. Kórsetkishterdi bazaǵa engizip, áriptesterimizge joldaımyz. Tutynýshylardy «Astanaenergosbyt» keńsesine joldap jatqan joqpyz. Ondaǵy áriptesterimizben baılanysyp, máseleni osy jerde sheshemiz. Qajet bolsa óz bazamyzǵa da túzetý engizemiz nemese «Astanaenergosbyt» ózinde túzetý jasaıdy», - dep túsindirdi Ǵabıdýlla Qojabaev.

Al tutynǵan elektr qýaty durys eseptelgenine kóz jetkizgisi kelgen astanalyqtar «Astana AEK» kásipornyna óz derbes shotyn kórsetip, ótinish jazý kerek.

«Ótinishti sýretke túsirip, «Astana AEK»-niń elektrondy poshtasyna joldaýǵa bolady. Biz bul ótinishti pysyqtap, kelesi aıdyń esebinde túzetemiz. Eger kelesi aıda túzetý baıqalmasa, bizge júginýge negiz bolady», - dedi kásiporyn ókili.