«Astana-AEK» uıashyqtardyń apatty jaǵdaıda ajyraǵanyn habarlady
NUR-SULTAN. QazAqparat – Búgin tańǵy saǵat 04:26-da «Novaıa» qosalqy elektr stansasynyń 10 kV-tyq uıashyǵy apatty jaǵdaıda ajyrady. Bul oqıǵa jaıynda «Astana-AEK» AQ baspasóz qyzmetiniń Instagram paraqshasynda jarııalandy, dep habarlaıdy QazAqparat tilshisi.
Kompanııa málimetinshe, elektr jaryǵynyń ajyraýyna «Ulttyq bıotehnologııalyq ortalyǵy» respýblıkalyq memlekettik kásiporny balansyndaǵy RP-200 jáne RP-99 qosalqy stansalarynyń 10 kV-tyq kabel jelileriniń zaqymdanýy sebep bolǵan. Sonyń saldarynan 8 zańdy nysanǵa, 10 kóppáterli turǵyn úıge jáne bir jeke turǵyn úıge elektr energııasyn berý shektelgen. Tańerteńgi saǵat 08-00-de jedel-kóshpeli brıgada 4 kóppáterli turǵyn úıge dızel generatory arqyly elektr energııasyn berdi. Qalǵan nysandar ózderiniń menshiginde bar dızel generatorlaryna qosylǵan.
Kabel jelisiniń trassasyn tekserý barysynda qazylǵan eki úńgir tabyldy. Sol úńgirler arqyly kabel jelisiniń mys ekrany urlanyp, elektr energııasyn taratý jelisi isten shyqqan. Qazirgi ýaqytta apatty-qutqarý jumystary júrgizilip jatyr.
