«Astana-AEK» elektroenergetıkalyq nysandaryn jańǵyrtýǵa 5,5 mlrd. teńge bólindi

Bul týraly búgin QR Tabıǵı monopolııalardy retteý agenttiginiń Astana qalasy boıynsha departamentiniń bastamasymen ótkizilgen baspasóz-týry barysynda kompanııanyń ekonomıkalyq bóliminiń basshysy Olga Arýja málim etti.

Onyń aıtýynsha, atalmysh qarajat tozyǵy jetken jabdyqtardy aýystyrýǵa, elektr energııasyn esepke alýdy jetildirýge, kólikterdi jańartýǵa, ákimshilik korpýsy bar óndiristik jóndeý bazasynyń qurylysy, jobalyq jáne zertteý jumystaryna bólinetin bolady.

Bul is-sharalardy júzege asyrý nátıjesinde «Astana-AEK» AQ ınvestıtsııalyq baǵdarlamany júzege asyrýdyń barlyq kezeńi ishinde 243 mln. astam teńgege jıyntyq ekonomıkalyq tıimdilikke qol jetkizýdi josparlaýda. Normatıvtik-tehnıkalyq ysyraptardy 34,8 mln. teńgege azaıtyp, negizgi quraldardyń tozyǵyn 47 paıyzǵa deıin tómendetýdi kózdep otyr.

Aıta keteıik, QR Tabıǵı monopolııalardy retteý agenttiginiń bekitýimen «Astana-AEK» 2009-2012 jyldar aralyǵynda ınvestıtsııalyq baǵdarlamany iske asyrǵan bolatyn. Onyń aıasynda 2,9 mlrd. teńge bólinip, kompanııanyń tehnıkalyq-ekonomıkalyq kórsetkishterin jaqsartýǵa múmkindik berdi. Sonymen qatar normatıvti shyǵyndar 15,3 paıyzdan 13,38 paıyzǵa deıin azaıtyldy, negizgi quraldardyń tozyǵy 65 paıyzdan 47 paıyzǵa deıin tómendetildi, apattyq jaǵdaılar edáýir qysqardy. 2012 jyldyń 1 sáýirinen bastap normatıvten tys ysyraptar tolyq joıyldy. Baǵdarlamany júzege asyrý kezeńinde 286,7 mln. teńge únemdelgen.