«Astana-Adler» halyqaralyq jolaýshylar poıyzy 3 maýsymnan bastap júredi
ASTANA. QazAqparat - 3 maýsymnan bastap jazǵy maýsymǵa «Astana-Adler» halyqaralyq jolaýshylar poıyzy iske qosylady, dep habarlaıdy «Jolaýshylar tasymaly» AQ baspasóz qyzmeti.
«Jazǵy demalys maýsymynda jolaýshylar tasymalyna suranystyń artýyna baılanysty «Jolaýshylar tasymaly» Aktsıonerlik qoǵamy 2014 jylǵy 3 maýsymnan bastap jazǵy maýsymǵa №483/484 «Astana-Adler» halyqaralyq jolaýshylar poıyzyn jiberýdi josparlap otyr», - delingen habarlamada.
Atalmysh poıyz jazǵy maýsymda aptasyna eki márte, Astanadan seısenbi men senbi kúnderi 3 maýsym men 30 tamyz aralyǵynda attanyp, Adlerge juma-seısenbi kúnderi 6 maýsym men 2 qyrkúıek aralyǵynda keledi. Adlerden senbi jáne sársenbi kúnderi 7 maýsym men 3 qyrkúıek aralyǵynda júrip, Astanaǵa seısenbi men senbi kúnderi 10 maýsym men 6 qyrkúıek aralyǵynda keledi. Poıyz quramdarynda «Qostanaı-Adler», «Pavlodar-Adler» jáne «Qaraǵandy-Adler» baǵytyndaǵy aýysymsyz vagondary da bar.
Sondaı-aq, «Qaraǵandy-Máskeý» baǵytyndaǵy №83/84 júrdek halyqaralyq poıyzy jyl boıyna kún saıyn júretin bolady. Taǵy bir aıta keterligi, «Reseı temir joldary» AAQ tıesili №391/392 «Barnaýl-Lenınogorsk» poıyzynyń marshrýtyna ózgeris engizilip, «Tomsk-Lenınogorsk» baǵytynda qatynaı bastaıdy. Týyndaǵan suraqtar boıynsha temir jol vokzaldarynyń anyqtamalyqtaryna nemese 105 biregeı anyqtama qyzmetine habarlasýǵa bolady.
