«Astana - adaldyq alańy» jobasynyń nátıjesi qandaı
Astana ákiminiń sózine qaraǵanda, bir ǵana «e-áleýmettik qamsyzdandyrý» jelisi boıynsha 100 myńǵa jýyq qaǵazbasty jumystan qutyldy. Endi, zeınetkerler men múmkindigi shekteýli azamattar qujat jınap, áýrege túspeıdi. Eńbek, jumyspen qamtý jáne áleýmettik qorǵaý basqarmasyna baryp, jeke kýáliktiń negizinde barlyq qajetti qujattardy shyǵara alady. Sebebi ortalyq memlekettik organdardyń aqparattyq bazalaryna kirýge ruqsat berildi.
«Endi, bıyl biz sáýlet pen jer qatynastary salasyndaǵy protsessterdi barynsha ońtaılandyrýǵa kúsh salamyz. Sebebi bıznes úshin barlyǵy ashyq ári tıimdi bolýy qajet. Shyny kerek, bunyń barlyǵyn iske asyrý ońaı emes. Degenmen, kelesi aıda biz osy jumysqa bilek sybanyp kirisemiz. Árıne, memlekettik satyp alýlar da nazardan tys qalmaıdy. Bıyl sonyń bárin sheshetin bolsaq, jaqsy bolar edi», - deıdi Á.Isekeshev.
QR Memlekettik qyzmet isteri jáne sybaılas jemqorlyqa qarsy is-qımyl agenttiginiń tóraǵasy Alık Shpekpaevtyń aıtýynsha, osy saladaǵy barlyq sharalardyń negizgi maqsaty - turmystyq jemqorlyqty joıý. Osy oraıda tsıfrlyq tehnologııalardyń róli zor. «Máselen, «Astana - adaldyq alańy» jobasy aıasynda áleýmettik qamsyzdandyrý salasyndaǵy 9 qyzmettiń ekeýi elektrondy formatqa aýystyryldy. Sonyń arqasynda zeınetkerler men múgedekter ýaqytty únemdeıdi. Al qyzmetkerler arasynda jemqorlyq áreketteri azaıady», - dep atap kórsetti A.Shpekpaev.
Joba aıasynda jemqorlyq jaǵynan táýekeli joǵary 50 mamandyqtyń tizimi de jasaldy. Sonyń negizinde arnaıy ádisteme ázirlenip, jergilikti mekemelerdiń basshylaryna taratyldy. Olar óz kezeginde atalǵan qyzmetkerlerdi baqylaýda ustap qana qoımaı, jumysyn da baǵalaı alady. Bunyń barlyǵy qyzmetkerdiń jalaqysyna, bonýstaryna áser etedi. Budan bólek, «Astana - adaldyq alańy» jobasynyń keńsesi qoǵamdyq densaýlyq basqarmasymen birlese otyryp, emhanalarda halyqqa sapaly qyzmet kórsetý algorıtmin jáne biryńǵaı brendbýkty ázirlep shyqty. Emhanalardyń logotıpi jasaldy. Eki aıda atqarylǵan sharalar osymen shektelmeıdi. Joba jetekshisi Jazıra Jylqyshıevanyń aıtýynsha, qazirgi kezde mamandar sáýlet, qala qurylysy men jer qatynastary salasyndaǵy máselelerdi zerdeleýge kiristi. Bir aıdyń ishinde atalǵan mekemelerdiń jumysyn jetildirip, sol jerde sybaılas jemqorlyqty barynsha azaıtýǵa qatysty naqty usynystar ázirlenedi.
«Shyny kerek, osy salalarda problema óte kóp. Normatıvtik-quqyqtyq aktilerdiń olqy tustary, elektrondy kezek pen beınebaqylaýdyń bolmaýy jáne taǵy basqa máselelerdi áli de sheshý kerek», - deıdi J.Jylqıshıeva.
Búgingi keńeste aýdan ákimderi men jergilikti atqarýshy organdardyń basshylary «Jeke jaýapkershilik» qujatyna qol qoıdy. Oǵan sáıkes, jemqorlyq áreketteri jıi bolatyn mekeme basshysy da óz qyzmetkerleri úshin jaýap beretin bolady.
Keńesten keıin Alık Shpekbaev pen Áset Isekeshev birneshe basqarmanyń jumysymen tanysyp, eki aıda atqarylǵan jumysty kórip shyqty.