«Astana - adaldyq alańy» sybaılas jemqorlyqqa qarsy is-qımyl jobasy bastaldy
ASTANA. QazAqparat - Astana qalasy ákimdigi men QR Memlekettik qyzmet isteri jáne sybaılas jemqorlyqqa qarsy is-qımyl agenttigi «Astana - adaldyq alańy» birlesken jobany júzege asyrýdy bastady, dep habarlaıdy Astana qalasy ákimdiginiń resmı saıty.
Astana ákimi Áset Isekeshev jáne Agenttik tóraǵasy Alık Shpekbaev joba jarǵysyna qol qoıdy. Bolashaqta sybaılas jemqorlyqqa qarsy is-qımylda jańa ádister engizý maqsatynda osy joba menedjmenti qoldanylatyn bolady.
Jobanyń negizgi mindetteri - turǵyndardyń sybaılas jemqorlyqqa qarsy minez-qulyq úlgisin odan ári damytý men jemqorlyq máselesin memlekettik qyzmet kórsetý sapasyn arttyrý arqyly sheshý, turmystyq jemqorlyqty joıý, azamattar jáne bıznes úshin kedergisiz jáne qolaıly jaǵdaılar jasaý, memlekettik organdar qyzmetiniń ashyqtyǵy, aýqymdy qoǵamdyq baqylaý júrgizý.
Joba aıasynda memlekettik mekeme qyzmetkerleriniń eńbekaqysyn qaıta qaraý, mekeme basshylarynyń jeke jaýapkershiligin arttyrý, qyzmetterdiń barlyq baǵyttary boıynsha sybaılas jemqorlyqqa qarsy is-qımyldy arttyrý jáne taǵy basqa máseleler qamtylady.
Joba boıynsha Astana qalasy ákimdigi men Agenttiktiń qalalyq departamenti birlesip joba keńsesin qurdy.
«Astana turǵyndary men qonaqtary memlekettik organdardyń qyzmetin jaqsartý jáne sybaılas jemqorlyqtyń deńgeıin tómendetý, joıý boıynsha ózderiniń usynystaryn eńgizýlerine bolady. Sondaı-aq, jumys barysynda týyndaǵan máselelerdi qaraý úshin kásipkerler, ǵalymdar, azamattyq sektordyń jáne BAQ ókilderi arasynan sarapshylar tartylǵan», - dep atap ótti joba keńsesiniń jetekshisi J. Jylqyshıeva.
Eger siz joba jumysyna qatysqyńyz kelse nemese óz usynystaryńyzdy joldaǵyńyz kelse myna elektrondyq poshta ast.project@mail.ru, sondaı-aq, Whats'app +7775 160 55 32 nómirine joldaı alasyz.
Uıymdastyrýshylardyń aqparaty boıynsha, joba Astana qalasynda iske asyrylady, keıin qalǵan aımaqtarda iske qosylady.
