Astana 25 eldiń jaýynger-áskerı qyzmetshilerin qarsy alady
ASTANA. KAZINFORM – Elordada áskerı qyzmetshiler arasynda Halyqaralyq áskerı sport keńesiniń (Conseil International du Sport Militaire) qoldaýymen qazaq kúresinen I-shi álem chempıonaty ótedi. Bul týraly Qorǵanys mınıstrliginiń baspasóz qyzmeti habarlady.
Birinshiliktiń ashylýy 14 tamyzda Qazaqstan jeńilatletıkalyq sport kesheniniń bazasynda ótedi. CISM týrnıriniń uıymdastyrýshylary — Qorǵanys mınıstrliginiń Sport komıteti, Týrızm jáne sport mınıstrligi jáne Astana qalasy ákimdiginiń qoldaýymen Qazaq Kuresi qaýymdastyǵy.
Áskerı qyzmetshiler arasynda qazaq kúresinen ótetin I-shi álem chempıonatynda álemniń 25 armııasynyń balýandary baǵyn synaıdy. Qazaqstannyń namysyn Qarýly kúshter men Memlekettik kúzet qyzmeti quramynyń myqty sportshylary qorǵaıdy. Jekpe-jek erler arasynda (55 keli, 60 keli, 66 keli, 74 keli, 82 keli, 90 keli, 100 kelige deıin jáne odan joǵary) jáne áıelder arasynda (48 keli, 52 keli, 56 keli, 60 keli, 65 keli, 70 keli, 77 kelige deıin jáne odan joǵary) 16 salmaq dárejesi boıynsha ótedi.
Qazaqstan ótken jyldyń mamyr aıynda Tanzanııadaǵy Sonseil International du Sport Militaire 79-shy Bas assambleıasynda jáne kongresinde jekpe-jektiń eń kóne túriniń tusaýkeserinen keıin áskerı qyzmetshiler arasynda qazaq kúresinen I-shi álem chempıonatyn ótkizý quqyǵyna ıe boldy.
Álem chempıonaty Keńes Odaǵynyń Batyry Álııa Moldaǵulovanyń 100 jyldyǵyna oraılastyrylǵan. Іs-shara aıasynda otandasymyzdyń ómiri men erligine baılanysty biregeı qujattar, fotosýretter jáne artefaktiler qoıylatyn taqyryptyq kórme ótedi. Budan basqa, sport forýmynyń qonaqtary qazaq mádenıetiniń atmosferasymen tanysa alady, ıaǵnı arenanyń janynda kıiz úıler, ulttyq jádigerler men dástúrli óner úlgileri ornatylady.
Esterińizge sala ketsek, Conseil International du Sport Militaire — Halyqaralyq Olımpıada komıtetinen keıingi ekinshi mańyzdy sporttyq uıym. Ol 140-qa jýyq el qarýly kúshteri ókilderiniń basyn qosady.
Chempıonatty sátti ótkizý otandyq kúres tarıhynda betburys jasaýǵa yqpal etedi dep kútilýde, óıtkeni CISM qazaq kúresin álemdik armııa týrnırleriniń jyl saıynǵy baǵdarlamasyna, odan bólek 2027 jyly AQSh-ta ótetin dúnıejúzilik áskerı oıyndarǵa qosý múmkindigin qarastyryp jatyr.
Aıta ketelik Aqtaýda Qazaqstan Áskerı-teńiz kúshteriniń jedel-taktıkalyq oqý-jattyǵýy aıaqtaldy.