Astana 2027 jyly Ortalyq Azııadaǵy iri tsıfrlyq forýmdy qabyldaıdy
ASTANA. KAZINFORM — 2027 jyldyń kúzinde Astanada jasandy ıntellekt, 5G jáne tsıfrlyq ınfraqurylymdy damytýǵa arnalǵan GSMA M360 Eurasia halyqaralyq forýmy ótedi. Bul jónindegi kelisimge Qazaqstannyń Jasandy ıntellekt jáne tsıfrlyq damý mınıstrligi men GSMA qol qoıdy. Bul týraly vedomstvonyń baspasóz qyzmeti málim etti.
Qazaqstan Respýblıkasy Jasandy ıntellekt jáne tsıfrlyq damý mınıstrligi men GSMA jahandyq qaýymdastyǵy AI & Digital Bridge 2026 forýmy aıasynda ózara túsinistik týraly kelisimge qol qoıdy. Osy qujatqa sáıkes, 2027 jyldyń kúzinde Astanada M360 Eurasia halyqaralyq forýmy ótedi.
Aýqymdy shara jasandy ıntellekt tehnologııalaryn damytýǵa, tsıfrlyq ınklıýzıvtilikti keńeıtýge, normatıvtik-quqyqtyq retteý máselelerine jáne zamanaýı baılanys ınfraqurylymyn ilgeriletýge arnalady. Shara bir alańda halyqaralyq sarapshylardy, retteýshilerdi, tehnologııalyq ınnovatorlardy jáne Ortalyq Azııa men álemniń jetekshi naryq qatysýshylaryn biriktiredi. Forýmnyń qabyldaýshy demeýshisi — Beeline Qazaqstan (VEON toby).
M360 Eurasia forýmyn ótkizý orny retinde Qazaqstannyń tańdalýy eldegi tsıfrlyq transformatsııa úderisteriniń qarqynymen jáne JI-ekojúıesiniń dáıekti damýymen baılanysty. Elde arnaıy zańnama men ulttyq is-qımyl jospary qabyldanyp, kadrlar daıarlaý men startaptardy qoldaýǵa arnalǵan AI-Sana baǵdarlamasy sátti jumys istep tur, sondaı-aq bilim berýdi, ǵylymı-zertteý qyzmetin jáne memlekettik sektorǵa JI-sheshimderin engizýdi biriktiretin Alem.ai platformasy iske qosyldy.
Tsıfrlyq bastamalardyń tabysty bolýy telekommýnıkatsııalyq ınfraqurylymdy aýqymdy modernızatsııalaýmen qýattalýda: 5G jelilerin belsendi engizý, óńirdegi qurylǵylarmen tikeleı baılanystyń (direct-to-device) alǵashqy prototıpin testileý, spýtnıktik baılanysty damytý, qýaty 1 GVt-qa deıingi derekterdi óńdeý ortalyqtarynyń (DÓO) iri klasterin salýǵa daıyndyq jáne Kaspıı ústi talshyqty-optıkalyq baǵyty jobasyn júzege asyrý.
— 2027 jyly Astanada GSMA M360 Eurasia halyqaralyq forýmyn ótkizý — Qazaqstannyń óńirdegi negizgi tsıfrlyq jáne telekommýnıkatsııalyq hab retindegi mártebesin kezekti ret dáleldeıtin mańyzdy oqıǵa. GSMA — jetekshi mobıldi operatorlardyń basyn qosatyn jáne búkil salanyń standarttaryn aıqyndaıtyn eń iri jahandyq uıym. Elimiz úshin M360 Eurasia forýmyn ótkizý halyqaralyq yntymaqtastyqty nyǵaıtýǵa, ınvestıtsııalar tartýǵa, sondaı-aq Ortalyq Azııada jáne odan tys jerlerde ınfraqurylymdyq, telekommýnıkatsııalyq jáne JI-bastamalaryn ilgeriletýge arnalǵan bedeldi alańǵa aınalady, — dep Jaslan Madıev aldaǵy forýmnyń mańyzdylyǵyn atap ótti.
Al GSMA-nyń Eýropa jáne Ortalyq Azııa óńiri boıynsha basshysy Laslo Tot Qazaqstannyń tsıfrlyq ekojúıesimen kópjyldyq jemisti yntymaqtastyqty atap ótti.
— M360 Eurasia forýmyn Qazaqstanda ótkizý týraly sheshim GSMA men eldiń tsıfrlyq ekojúıesi arasyndaǵy berik ári kópjyldyq seriktestikti kórsetedi. Radıojıilik spektri salasyndaǵy saıasattan bastap 5G jelilerin óristetýge, tsıfrlyq ınfraqurylymǵa, JI salasyndaǵy ınnovatsııalarǵa jáne jergilikti tilderde JI-sheshimderin ázirleýge deıin — biz óńirde birqatar strategııalyq basymdyqtar boıynsha ósip kele jatqan serpindi kórip otyrmyz. Astana — óńirdiń jáne odan tys aýmaqtardyń sala kóshbasshylaryn, retteýshilerin jáne ınnovatorlaryn tsıfrlyq ekonomıkanyń bolashaǵyn birge aıqyndaý úshin biriktiretin M360 Eurasia jańa taraýynyń tabıǵı alańy, — dedi ol.
Beeline Qazaqstan holdınginiń bas dırektory Djabbor Kaıýmov:
— Qazaqstanda telekommýnıkatsııalyq jáne tsıfrlyq kompanııalardyń óte kúshti qaýymdastyǵy qalyptasty, al jaqynda iske qosylǵan Starlink Mobile sııaqty ınnovatsııalar elimizdiń eń ozyq sheshimderdi engizýge qabiletti ekenin kórsetedi. M360 Eurasia 2027 forýmy jınaqtalǵan saraptamalyq tájirıbemen halyqaralyq aýdıtorııamen bólisýge múmkindik berip, ony jahandyq tehnologııalyq ekojúıege odan ári ıntegratsııalaýǵa yqpal etetinine senimdimin, — dedi.
Anyqtama: GSMA — mobıldi ekojúıeni biriktiretin jahandyq uıym. Músheleri úshin uıym 3 negizgi baǵyt boıynsha jumys isteıdi: «Igilikke arnalǵan baılanys» (Connectivity for Good), «Salalyq servıster men sheshimder» (Industry Services and Solutions) jáne «Ózara is-qımyl men ilgeriletý» (Outreach). Uıym normatıvtik-retteý saıasatyn jetildirýdi, áleýmettik máselelerdi sheshýdi, tehnologııalardyń úılesimdiligin qoldaýdy jáne MWC men M360 halyqaralyq is-sharalar serııasyn uıymdastyrýdy qamtamasyz etedi.
Mınıstr Jaslan Mádıev buǵan deıin Qazaqstan jasandy ıntellektiniń energetıkalyq jáne chıptik ınfraqurylymnan bastap, úlken tildik modelder men qoldanbaly sheshimderge deıingi barlyq bes deńgeıin júıeli túrde damytýdy kózdep otyrǵanyn aıtty.
