Astana 2027 jyly mánerlep syrǵanaýdan Tórt qurlyq chempıonatyn qabyldaıdy
ASTANA. KAZINFORM — Halyqaralyq konkıshiler odaǵynyń (ISU) sheshimimen Astana 2027 jyly mánerlep syrǵanaýdan Tórt qurlyq chempıonatyn ótkizetin qala retinde resmı túrde bekitildi. Bul týraly UOK baspasóz qyzmeti habarlady.
Jarys 2027 jylǵy 9-14 aqpan aralyǵynda ótedi. Astanaǵa Azııa, Amerıka, Afrıka jáne Muhıt aımaǵynyń úzdik mánerlep syrǵanaýshylary jınalady. Týrnırdi ótkizý Qazaqstan úshin de, mánerlep syrǵanaýdyń jahandyq damýy úshin de mańyzdy oqıǵa bolmaq.
ISU málimetinshe, bul sheshim Qazaqstanda mánerlep syrǵanaýdyń tanymaldyǵynyń qarqyndy ósýiniń jalǵasy boldy. Buǵan 2026 jyldyń aqpan aıynda Mılan men Kortına-d’Ampetstsoda ótken qysqy Olımpıada oıyndarynda Mıhaıl Shaıdorovtyń erler arasyndaǵy jekeleı synda tarıhı altyn medal jeńip alýy úlken áser etti. Onyń jetistigi elde bul sport túrine degen qyzyǵýshylyqty buryn-sońdy bolmaǵan deńgeıge kóterip, jańa býyn sportshylar men jankúıerlerge shabyt berdi.
Tórt qurlyq chempıonaty Qazaqstan úshin mánerlep syrǵanaýdan eń iri týrnır bolmaq. Buǵan deıin elimiz 2011 jylǵy qysqy Azııa oıyndaryn jáne 2017 jylǵy qysqy Ýnıversıadany joǵary deńgeıde qabyldaǵan bolatyn. Atalǵan jarystardyń baǵdarlamasyna da mánerlep syrǵanaýdan básekeler engizilgen edi.
— Biz Qazaqstanda alǵash ret mánerlep syrǵanaýdan Tórt qurlyq chempıonatyn ótkizetinimizge qýanyshtymyz. Bul Ortalyq Azııadaǵy jankúıerler úshin álemdik deńgeıdegi jarysty óz kózderimen kórip, súıikti sportshylaryn qoldaýǵa tamasha múmkindik. Qazaqstanda mánerlep syrǵanaýdyń tanymaldyǵy jańa deńgeıge kóterildi jáne Astana sportshylar, jankúıerler men jarysqa qatysýshylar úshin tamasha alań bolatynyna senimdimiz. Qazaqstan bul týrnırge ózindik energııasyn, qonaqjaılyǵyn jáne órshil maqsattaryn alyp keletinine kúmán joq, — dedi ISU prezıdenti Kım Dje El.
Aıta ketelik Astanada álemdik mánerlep syrǵanaý juldyzdary óner kórsetken edi.
