Astana 2026 jyly ótetin Bolashaq oıyndarynyń estafetasyn qabyldady
AB-DABI. KAZINFORM — BAÁ astanasynda sportty, tsıfrlyq tehnologııalardy jáne ınnovatsııalyq sheshimderdi bir alańǵa toǵystyrǵan The Games of the Future Abu Dhabi 2025 halyqaralyq týrnıri óz máresine jetti. Alty kúnge sozylǵan jarystyń nátıjesinde 2026 jyly Astanada Bolashaq oıyndaryn ótkizetin Qazaqstanǵa estafeta saltanatty túrde tabystaldy.
Týrnır baǵdarlamasyna fızıkalyq jáne tsıfrlyq formattardy biriktiretin 11 fıdjıtal-dıstsıplına endi. Olar: fıdjıtal fýtbol, fıdjıtal basketbol 3×3 FreeStyle, fıdjıtal-faıtıng FATAL FURY: City of the Wolves, fıdjıtal-shýter CS2, Battle Royale (Fortnite), fıdjıtal-dansıng Just Dance, Dota 2, MLBB, VR-oıyn HADO Global Invitation, fıdjıtal-dron-reısıng jáne robottar shaıqasy. Arenalardaǵy jáne onlaın-translıatsııalardaǵy myńdaǵan kórermen, álemniń túkpir-túkpirinen kelgen júzdegen sportshy men ondaǵan komanda bolashaq sport túrleriniń búginde-aq jahandyq kún tártibiniń ajyramas bóligine aınalǵanyn aıqyn kórsetti.
Qazaqstannan týrnırge halyqaralyq arenada jarqyn óner kórsetken komandalar boldy.
PBC Astana komandasy Phygital Basketball.3on3 FreeStyle dıstsıplınasynda fınaldyq kezeńge sátti shyǵyp, minezi men taktıkalyq daıyndyǵyn, joǵary komandalyq úılesimdiligin pash etti. Týrnır qorytyndysy boıynsha komanda úshinshi oryndy ıelendi.
UEL TEAM komandasy Phygital Football dıstsıplınasynda tsıfrlyq kezeńniń barlyq matchtarynda jeńiske jetkenimen, fızıkalyq komponenttegi eki kezdesý jalpy nátıjege áser etip, komanda pleı-offtyń kelesi kezeńine óte almady. Bul nátıjeler mańyzdy sporttyq jetistik qana emes, sonymen qatar Qazaqstannyń jahandyq fıdjıtal qozǵalysyndaǵy róliniń artyp kele jatqanyn aıǵaqtaıdy.
Abý-Dabıdegi týrnır barysynda «Astana 2026 Bolashaq oıyndary dırektsııasynyń» resmı delegatsııasy jumys istep, jarystardy uıymdastyrýdyń basqarýshylyq, tehnıkalyq jáne operatsııalyq qyrlaryn zerdeledi. Jınalǵan tájirıbe men quzyretter 2026 jyly Astanada ótetin Bolashaq oıyndaryn daıyndaýdyń negizine aınalady. Bul joly Qazaqstan halyqaralyq jańa formattaǵy týrnırge qatysýshy ǵana emes, uıymdastyrýshy el retinde de alǵash ret shyǵady.
Fıdjıtal-sport (physical jáne digital sózderinen) dástúrli fızıkalyq belsendilik tsıfrlyq tehnologııalar men oıyn mehanıkalarymen tabıǵı túrde ushtasatyn sporttyń jańa býyny. Klassıkalyq sport pen kıbersporttan aıyrmashylyǵy fıdjıtal-jarystar eki baǵytty bir mezgilde biriktirip, jas sportshylardyń oıyndyq oılaýyn, sheshim qabyldaý jyldamdyǵyn jáne tsıfrlyq saýattylyǵyn damytýmen qatar, fızıkalyq tózimdilik, kúsh pen komandalyq rýhty da qalyptastyrady. Qazaqstan úshin bul baǵyt jastarǵa jańa múmkindikter ashyp, kıbersport pen dástúrli sport túrleri arasyndaǵy kópirdi nyǵaıtyp, jańa sporttyq ekojúıe qalyptastyrýǵa jol ashady.
The Games of the Future Abu Dhabi 2025 aıaqtalýymen jahandyq fıdjıtal qaýymdastyqtyń nazary Qazaqstanǵa aýysty. 2026 jyly Astana fıdjıtal-sporttyń jańa astanasyna aınalyp, álemniń úzdik komandalary men sportshylaryn qabyldaıdy. Astanada ótetin Bolashaq oıyndary iri sporttyq oqıǵa ǵana emes, sonymen qatar eldegi ınnovatsııalar, bilim, sport jáne tsıfrlyq mádenıetti damytýdyń qýatty draıveri bolyp, Qazaqstannyń jahandyq arenadaǵy pozıtsııasyn nyǵaıtady dep kútiledi.
Májilis depýtaty Sergeı Ponomarev 2026 jyldyń shilde-tamyz aılaryna josparlanǵan halyqaralyq «Bolashaq oıyndaryn» keıinge shegerýdi usyndy.
Eske salaıyq, «Bolashaq oıyndaryn» Qazaqstanda ótkizý týraly bastamany memleket basshysy Qasym-Jomart Toqaev 2024 jyly Qazan qalasynda kótergen bolatyn. 2025 jyly ótýi tıis bolǵan týrnır Qazaqstandaǵy sý tasqynyna baılanysty 2026 jylǵa shegerildi.