«Astana-2005» hokkeı komandasy Qazaqstan chempıony atandy
NUR-SULTAN. QazAqparat - 2005 jylǵy balalar arasynda shaıbaly hokkeıden «Astana-2005» komandasy Qazaqstan chempıony atandy, dep habarlaıdy QazAqparat.
Elordalyq Mádenıet jáne sport basqarmasynyń málimetinshe, «A» tobynda 2005 jylǵy balalar arasynda shaıbaly hokkeıden Qazaqstan chempıonaty aıaqtaldy. Tórt týrdyń qorytyndysy boıynsha Nur-Sultan qalasynyń №10 Shaıbaly hokkeıden Mamandandyrylǵan balalar-jasóspirimder sport mektebiniń tárbıelenýshileriniń «Astana-2005» komandasy 55 upaı jınap, Qazaqstan chempıony atandy.
Óskemendik «Torpedo» komandasy ekinshi oryn alyp, kúmis júlde ıelendi. Olardyń enshisinde 42 upaı. Al, Ekibastuz qalasynyń «PSO» komandasy óskemendik qarsylasynan eki upaı kem jınap, úshinshi oryndy qanaǵat tutty.
№10 MBJSM oıynshylary úzdikter qatarynan da tabyldy. Maýsym qorytyndysy boıynsha elordalyq Ádil Beısembaev «Úzdik shabýyldaýshy», «Torpedo» golkıperi Ivan Pylenok «Úzdik qaqpashy», al, Ekibastuz qalasynyń sportshysy Nıkıta Taskaev «Úzdik qorǵaýshy» atandy.
Aıta keteıik, bul maýsym «Astana-2005» hokkeı komandasy úshin sátti ótti. Elordalyq hokkeıshiler maýsym ishinde qaqpaǵa eń kóp gol soqqan - 187, al óz qaqpalaryna tek 42 shaıba ǵana ótkizgen.
Eske salaıyq, buǵan deıin 2005 jylǵy balalar komandasy «B» tobynda da shaıbaly hokkeıden Qazaqstan chempıonatynyń altyn júldesin jeńip alǵan bolatyn.
