Astana-1 vokzalynyń jańa kelbeti: qaıta jóndeýden keıin ǵımarat qandaı bolmaq
ASTANA. KAZINFORM - Astananyń eski vokzalyn zamanaýı talaptarǵa saı qaıta qalpyna keltirý jumystary júrgizilip jatyr. Búginde vokzaldyń jańa eskızderi usynylyp, rekonstrýktsııa jobasy aıasynda ǵımarat aýmaǵyn 8692,8 sharshy metrge deıin ulǵaıtý kózdelgen.
Joba boıynsha eskalatorlar men lıftiler aýystyrylyp, jolaýshylarǵa arnalǵan perrondardyń ústine arnaıy qalqalar ornatylady.
Birinshi jáne ekinshi qabattarǵa qosymsha qurylys salý esebinen vokzal aýmaǵy 582 m2-qa artady. Ǵımarattyń qasbeti men ishki bóligi otqa tózimdi, vandalǵa qarsy jáne tozýǵa tózimdi materıaldarmen qaptalady.
- Qazirgi ýaqytta demontaj jumystary 95%-ǵa aıaqtalyp, jalpy qurylys-montaj jumystarynyń 24%-y oryndaldy, - deıdi «QTJ» UK» AQ baspasózi.
Sondaı-aq, QTJ málimdeýinshe, vokzaldaǵy aýqymdy jóndeý jumystary tek ǵımarattyń ishin ǵana emes, kólik qozǵalysyn da qamtıdy.
Osyǵan baılanysty 2026 jyldyń 1 sáýirinen bastap Astana-1 stantsııasy arqyly ótetin elektropoezdardyń kestesi ózgerdi.
Jóndeý jumystary kezinde jolaýshylarǵa kelesi kesteni eskerý usynylady:
- №6829 «Sorokovaıa -Kókshetaý» -07:40 (attaný)
- №6830 «Kókshetaý -Sorokovaıa» -19:50 (kelý)
- №6829 «Sorokovaıa -Ereımentaý» -20:30 (attaný)
- №6831 «Ereımentaý -Sorokovaıa» -07:15 (kelý)
- №7507 «Nurly Jol – Kókshetaý» -06:07 (attaný)
- №887 «Nurly Jol -Býrabaı kýrorty» -10:35 (attaný)
- №7502 «Nurly Jol -Pavlodar» -16:50 (attaný)
- №6803 «Nurly Jol -Atbasar -Nurly Jol» -08:15 (attaný).
Eske sala keteıik, Astana-1 vokzalynyń jańa bóliginiń rekonstrýktsııasy qazannyń sońyna deıin aıaqtalatynyn jazǵan edik.
Buǵan deıin elimizde 40 jyl boıy jóndeýden ótpegen vokzaldar jańa kelbetke ıe bolatyny týraly habarladyq.
