Astana-1 vokzalynyń jańa bóliginiń rekonstrýktsııasy qazannyń sońyna deıin aıaqtalady
ASTANA. KAZINFORM – Qaıta jańartý nátıjesinde vokzaldyń jalpy aýmaǵyn 7 827 sharshy metrden 8 409 sharshy metrge deıin ulǵaıtý kózdelgen, dep habarlaıdy QR Kólik mınıstrliginiń baspasóz qyzmeti.
QR Kólik vıtse-mınıstri Taıjanov Jánibek Astana-1 temirjol vokzalynyń qaıta jańartý barysymen tanysty.
Іs-shara Astana qalasy ákimdiginiń, «QTJ» UK» AQ jáne «Qazrestavratsııa» ShJQ RMK ókilderiniń qatysýymen ótti.
Jumys sapary barysynda vıtse-mınıstr qazirgi ýaqytta negizgi qurylys-montaj jumystary júrgizilip jatqan vokzal kesheniniń jańa bóligin qarap shyqty.
Jobada zamanaýı ınjenerlik jáne tsıfrlyq sheshimderdi engizý, jańa qurylys tehnologııalaryn qoldaný, sondaı-aq jolaýshylar aǵynynyń ósýin, qaýipsizdik pen jaılylyq talaptaryn eskere otyryp, fýnktsıonaldyq josparlaýdy jańartý qarastyrylǵan.
Jańa bólikti qaıta jańartý kezeńinde jolaýshylarǵa qyzmet kórsetý úshin paıdalanylyp otyrǵan Astana-1 vokzalynyń eski bóligine erekshe nazar aýdaryldy. Vıtse-mınıstr jumys istep turǵan ǵımarattaǵy jolaýshylarǵa qyzmet kórsetý jaǵdaılarymen, onyń ishinde kútý zaly, massaj fýnktsııasy bar oryndyqtar, qoǵamdyq tamaqtaný nysandary, sanıtarlyq-turmystyq úı-jaılar jáne ózge de servıstik aımaqtarmen tanysty.
Vokzaldyń eski bóligi tarıhı-mádenı mura nysany bolyp tabylady. Ony qaıta jańartý tarıh jáne mádenıet eskertkishterin qorǵaý salasyndaǵy zańnama talaptaryn saqtaı otyryp, «Qazrestavratsııa» ShJQ RMK tarapynan júzege asyrylatyn bolady.
Qazirgi ýaqytta ǵımaratta obektiniń tarıhı kelbetin saqtaı otyryp, ony keıingi restavratsııalaýǵa jáne qazirgi paıdalaný jaǵdaılaryna beıimdeýge baǵyttalǵan daıyndyq jumystary júrgizilip jatyr.
Tekserý qorytyndysy boıynsha vıtse-mınıstr «QTJ» UK» AQ men merdiger uıymǵa jumys kestesin qatań saqtaý, jobanyń barlyq qatysýshylarynyń is-qımyldaryn úılestirý, sondaı-aq qurylys-montaj jumystarynyń ýaqtyly aıaqtalýyn jáne obektini paıdalanýǵa berýdi qamtamasyz etý jóninde naqty tapsyrmalar berdi.
Vokzal kesheniniń jańa bóligi boıynsha qurylys-montaj jumystarynyń aıaqtalýy bıyl qazan aıynyń sońyna deıin josparlanyp otyr.
- Astana-1 vokzalyn qaıta jańartý temirjol ınfraqurylymyn jańǵyrtý baǵdarlamasy sheńberinde júzege asyrylyp jatyr jáne tarıhı-mádenı mura obektilerin saqtaı otyryp, ótkizý qabiletin arttyrýǵa, jolaýshylarǵa qyzmet kórsetý sapasyn jaqsartýǵa, sondaı-aq kólik servısiniń zamanaýı standarttaryn engizýge baǵyttalǵan, - delingen habarlamada.
Osyǵan deıin elimizde 40 jyl boıy jóndeýden ótpegen vokzaldar jańa kelbetke ıe bolatyny týraly jazdyq.