Astana-1 vokzalyn qaıta jańǵyrtý jumystary qalaı júrip jatyr
ASTANA. KAZINFORM – Astana-1 temirjol vokzalyn qaıta jańǵyrtý jumystary bekitilgen kestege sáıkes jalǵasyp jatyr. Joba Memleket basshysynyń tapsyrmasymen qolǵa alynǵan temirjol ınfraqurylymyn jańǵyrtý baǵdarlamasy aıasynda iske asyrylýda, dep jazdy Kólik mınıstrligi.
Qazirgi ýaqytta nysanda shatyr men qasbetti ornatý, perron men konkorstyq ótkeldi rekonstrýktsııalaý jumystary júrgizilip jatyr. Sonymen qatar ishki árleý, káriz, sý, jylý jáne elektrmen jabdyqtaý, jeldetý jáne baılanys ınjenerlik júıelerin montajdaý jumystary atqarylýda.
«Qaıta jańǵyrtý aıaqtalǵannan keıin vokzal kesheniniń aýmaǵy 500 sharshy metrge ulǵaıyp, 8,7 myń sharshy metrge jetedi. Bul jolaýshylarǵa qolaıly jaǵdaı jasap, jyl saıyn artyp kele jatqan jolaýshylar aǵynyna sapaly qyzmet kórsetýge múmkindik beredi», – delingen habarlamada.
Qazirgi ýaqytta qurylys alańynda 255 maman men 12 birlik arnaıy tehnıka jumyldyrylǵan.
Astana-1 vokzaly 1990 jyly paıdalanýǵa berilgen. Osy ýaqytqa deıin munda tek aǵymdaǵy jóndeý jumystary júrgizilip kelgen.
Jańǵyrtý aıaqtalǵannan keıin vokzal qaýipsizdik, jaılylyq jáne qoljetimdilik boıynsha zamanaýı talaptarǵa tolyq sáıkes bolady. Jolaýshylar úshin jańa eskalatorlar, lıftiler men kótergish platformalar ornatylyp, pandýstar, ana men bala bólmeleri, zamanaýı sanıtarlyq toraptar jáne jaıly kútý zaldary jabdyqtalady.
Múmkindigi shekteýli azamattar úshin kedergisiz orta qalyptastyrýǵa erekshe nazar aýdarylýda. Vokzal aýmaǵynda taktıldi navıgatsııa ornatylyp, kórý qabileti nashar jolaýshylarǵa arnalǵan aqparattyq taqtaıshalar ornalastyrylady.
«Qaıta jańǵyrtý aıasynda zamanaýı beınebaqylaý, órt dabyly, qoljetimdilikti baqylaý jáne jolaýshylardy habardar etý júıeleri engizilýde. Sonymen qatar jańa LED-ekrandar ornatylyp, daýys arqyly habarlaý júıeleri, jıhazdar men tehnologııalyq jabdyqtar jańartylady», – dep habarlady jaýapty mekeme.
2026 jyldyń qańtar–shilde aılarynda Astana-1 stantsııasynyń jolaýshylar aǵyny 1,8 mıllıon adamnan asty. Onyń ishinde 908 myńnan astam jolaýshy elordadan jolǵa shyqsa, 977 myńnan astam adam Astanaǵa kelgen.
Aıta keteıik, elimizde jańǵyrtylǵan 70 temirjol vokzaly paıdalanýǵa berildi.
