Astana-1 temirjol beketinde tyrysqaq aýrýynyń aldyn alýǵa arnalǵan jattyǵýlar ótedi

ASTANA. QazAqparat – 31 mamyr kúni Astana-1 temirjol beketinde tyrysqaq aýrýynyń belgileri bar naýqas anyqtalǵan jaǵdaıda oryndalýy tıis is-sharalardy pysyqtaý jattyǵýlary júrgiziledi, dep habarlaıdy QazAqparat Kóliktegi sanıtarııalyq-epıdemıologııalyq baqylaý departamentine silteme jasap.

Álemdegi karantındik jáne asa qaýipti ınfektsııalarǵa, atap aıtqanda tyrysqaqqa qatysty shıelenisken epıdemıologııalyq jaǵdaıǵa baılanysty 31 mamyrda Kóliktegi sanıtarııalyq-epıdemıologııalyq baqylaý departamenti Astana qalasynyń medıtsınalyq uıymdary jáne temirjol kásiporyndarymen birlesip, tyrysqaqtyń taralýyn boldyrmaýǵa arnalǵan jattyǵý ótkizedi.

Oqý-jattyǵýdyń maqsaty – Astana-1 beketinde jolaýshylar poıyzynda jáne temirjol vokzalynda tótenshe jaǵdaılardy joıýǵa jumyldyrylǵan qyzmetterdiń ázirligi men ózara is-qımylyn baǵalaý, asa qaýipti jáne karantındik ınfektsııalardy tirkeý, atap aıtqanda jolaýshylar poıyzynda tyrysqaq aýrýyn anyqtaý kezinde, tótenshe jaǵdaılarda sanıtarlyq-epıdemıologııalyq jáne epıdemııaǵa qarsy jáne sanıtarlyq-profılaktıkalyq is-sharalardy júzege asyrýdy pysyqtaý.

Adamzat tarıhynda tyrysqaqtyń 7 pandemııasy boldy. Dúnıejúzilik densaýlyq saqtaý uıymynyń málimeti boıynsha, qazirgi ýaqytta Afrıka, Azııa jáne Karıb teńizindegi 24 el indettiń órshýi týraly habarlady. 4 aıda álemde 86 myńnan astam adam aýyryp, 1 600-den astam adam qaıtys boldy.

Apta saıyn Qazaqstannyń memlekettik shekarasyn 70 myńǵa jýyq jolaýshy kesip ótedi, onyń 16 myńnan astamy birqatar asa qaýipti jáne karantındik ınfektsııalar, sonyń ishinde tyrysqaq aýrýynan zardap shekken Ońtústik-Shyǵys Azııa elderinen.