Assy-Túrgen observatorııasy Starlink-ke qosylady
ASTANA. KAZINFORM – Akademık Tóken Omarov atyndaǵy Assy-Túrgen observatorııasy 2026 jyly Starlink-ke qosylady. Bul jaıynda Senat depýtattarynyń saýalyna Úkimet basshysy Oljas Bektenovtiń jaýabynda aıtylǵan.
- Observatorııa ınstıtýttyń («V.G. Fesenkov atyndaǵy Astrofızıkalyq ınstıtýt» JShS) negizgi baqylaý bazasy sanalady. Ol Almaty qalasynan 100 shaqyrym qashyqtyqtaǵy Assy-Túrgen bıik taýly ústirtinde ornalasqandyǵynan qalalyq elektr jelisine jáne keń jolaqty Internetke tikeleı qosylmaǵan. Búginde observatorııa elektr energııasymen dızel-generatorlardan qamtamasyz etiledi, dızel otynynyń qory bar. Qazirgi ýaqytta onyń qyzmetin qamtamasyz etýde problema joq. Jobanyń joǵary qunyn, tehnıkalyq kúrdeliligi men aýqymyn eskersek, energııamen jabdyqtaýǵa qomaqty qarajat pen ýaqyt qajet, - dedi Premer-mınıstr.
Osy oraıda ol observatorııany energııamen jabdyqtaý máselesi pysyqtalyp jatqanyn atap ótedi.
- Observatorııaǵa talshyqty-optıkalyq baılanys jelisin júrgizýge kelsek, obektiniń taýly jerlerde ornalasýy mundaı jobany tehnologııalyq turǵydan kúrdeli ári ekonomıkalyq turǵydan tıimsiz etetinin atap ótemiz. Óz kezeginde, Jasandy ıntellekt jáne tsıfrlyq damý mınıstrligi el aýmaǵynda bıyl geostatsıonarlyq emes spýtnıktik júıeler («Starlink» tehnologııasy arqyly) qoldanylatyn Internetti paıdalanýdy iske qosty. 2026 jyldyń basynan bastap ınstıtýt osy tehnologııany paıdalanýdy jáne Starlink-ke qosylýdy josparlap otyr. Bul observatorııanyń Internetke qoljetimdiligin qamtamasyz etý máselesin sheshedi, - dedi Oljas Bektenov.
Buǵan deıin 11-synyp oqýshysy elimizde tuńǵysh ret mektep aýlasynda astronomııalyq observatorııa salýdy usynǵanyn jazǵan edik.