Assenızatorlar nájisti Almaty aýlalarynda tógip júr
ALMATY. QazAqparat - Assenızatorlar qalada káriz sýyn qabyldaıtyn orynnyń baryna qaramastan nájisti Almaty aýlalarynda tógip júr. 6 kólik ıesine Almaarasan shatqalynda nájis tókkeni úshin aıyppul salyndy.
Bul týraly «Tospa sý» MKK baspasóz hatshysy Serik Shaǵyrov aıtty.
«Sáýirde tabıǵat qorǵaý polıtsııasy birneshe assenızator kóligin zańsyz nájis tókkeni úshin ustaǵan bolatyn. Dúısenbiden bastap jumys qaıta bastaldy. Keshe osyndaı kólikter nájisti Almaarasan taýyndaǵy qoǵamdyq tamaqtaný ornynyń janyna aýdaryp tastaǵan. Osylaısha, taýda 6 kólik ustalyp, aıyppul salyndy. Qazirgi tańda bizdiń tobymyz Baǵanashyl aýylynda jumys jasap jatyr. Ár aýdanda jeke úıler bar. Olardan alynǵan nájis sýlaryn assenızator kólikter kelesi kósheden shyqpaı jatyp, kez-kelgen saıǵa, ózenge, káris qudyǵyna tógip kete beredi. Bul káriz júıesin odan ári bitep, kárizdegi aǵyn sý syrtqa aǵyp jatyr», - dedi Serik Shaǵyrov.
Onyń aıtýynsha, qalada qazir 600-ge jýyq assenızator kóligi jumys jasap júr. Olardan bólek oblystyq kólikter de bar.
«Búgin Rozybakıev-Jandosov kósheleriniń qıylysyndaǵy aýlalardyń birinde bireýdiń nájis tógip ketkeni belgili boldy. Sáýirde týra sondaı oqıǵa «Praım plaza» saýda úıiniń janynda Saın men Raıymbek kósheleriniń qıylysynda oryn alǵan», - dedi ol.
Búginde qalada osyndaı kólikterdi zararsyzdandyratyn ári jelilerdi jýatyn qabyldaý pýnkti bar. Negizi talap boıynsha ol turǵyn úılerden 1 shaqyrym qashyqtyqta bolǵany jón.
«Asssenızator ıeleri qala syrtyndaǵy qabyldaý pýnktine jetý qıyn dep shaǵymdanýda. Biz Tutynýshylardyń quqyǵyn qorǵaý komıtetimen birige otyryp, qalada ýaqytsha qabyldaý oryndaryn ashý máselesin qarastyryp otyrmyz. «Kishi Almaty», «Úlken Almaty», «Kazachka» ózenderiniń boıynda ornalasqan kottedj ıeleri de káriz sýlaryn ózenderge tastaıdy. Osy baǵytta da tabıǵatty qorǵaý polıtsııasymen birige otyryp reıd jasap jatyrmyz», - dedi S.Shaǵyrov.
