Assambleıanyń konstıtýtsııalyq mıssııasy el damýy úshin mańyzdy máselelerdi sheshýmen de erekshelenedi

ASTANA. 23 sáýir. QazAqparat - Assambleıanyń konstıtýtsııalyq mıssııasy el damýy úshin mańyzdy máselelerdi sheshýmen de erekshelenedi. Búgin Astanada Qazaqstan halqy Assambleıasynyń 20-sessııasy qarsańynda ótken Assambleıa Keńesiniń keńeıtilgen otyrysy barysynda QR Memlekettik hatshysy Marat Tájın osylaı málim etti.

Memlekettik hatshynyń aıtýynsha, búgingi kúni Assambleıa jalpyulttyq birlik pen qoǵamdyq kelisim ınstıtýty retinde qalyptasty. «Assambleıa memleket pen qoǵamnyń áleýmettik damý baǵytyndaǵy keń aýqymdy máselelerdi talqylaıtyn ámbebap alańǵa aınalyp otyr. Bul rette áleýmettik-qoǵamdyq saladaǵy Assambleıanyń áleýetin eskere otyryp, atalmysh ınstıtýtqa memlekettik tildiń damý aıasyn keńeıtý, áleýmettik ádildik prıntspteriniń júzege asyrylýyn baqylaý, áleýmettik jańǵyrý sekildi memlekettiń strategııalyq mindetteri júktelgen», - dedi M. Tájın.

Memlekettik hatshynyń aıtýynsha, qoǵamdyq kelisim men turaqtylyqty qamtamasyz etýge baǵyttalǵan Assambleıanyń konstıtýtsııalyq mıssııasy el damýy úshin mańyzdy máselelerdi sheshýmen de erekshelenedi. «Álemniń kóptegen memleketterindegi birqatar ultaralyq qatynastardyń retteýishterine qaraǵanda, qazaqstandyq biregeı ınstıtýt óziniń ornyqtylyǵyn dáleldep qana qoımaı, damý deńgeıinde naqty memlekettik, qoǵamdyq, áleýmettik tetik retinde tıimdiligimen aıqyndaldy», - dedi M. Tájın.

Budan bólek, Memlekettik hatshy Elbasy Joldaýyn júzege asyrý aıasynda Qazaqstan halqy Assambleıasynyń 2020 jylǵa deıingi Damý tujyrymdamasy ázirlengenin aıta kele, bul tujyrymdamany júzege asyrý jospary bekitilgenine de toqtaldy.