Assambleıanyń 25 jyldyǵy qarsańynda kóp jumys jasalýy kerek - BQO ókilderi
Shara barysynda aıtylǵanyndaı, sessııada sóılegen sózinde Tuńǵysh Prezıdent Nursultan Nazarbaev Assambleıanyń ultaralyq tatýlyq pen turaqtylyqtyń biregeı úlgisine aınalǵanyn atap ótti.
Mine, on eki jyl boıy QHA-dan saılanǵan 9 depýtat Májiliste elimizdiń damýyna, kelisim men yntymaqtyń ornyǵa túsýine óz úlesterin qosyp keledi.
«Aldaǵy jyly Assambleıaǵa 25 jyl tolady. Shırek ǵasyr az ýaqyt emes. Mine, osy mereke qarsańynda kóp qyrly, keń aýqymdy jumystar atqarylatyn bolady», dedi sharany júrgizgen BQO QHA tóraǵasynyń orynbasary, hatshylyq meńgerýshisi Ǵaısa Qapaqov.
Sondaı-aq sessııaǵa baryp kelgen «Aǵaıyn» qazaq etnomádenı birlestiginiń tóraǵasy Maqsot Bergen el birligin arttyrý baǵytyndaǵy óz oı-tolǵamdarymen bólisti.
«Biz, eń bastysy, táýelsizdigimizdi kózdiń qarashyǵyndaı saqtaı bilýimiz kerek. Elimizdiń myqtylyǵy - osy bereke-birliktiń, yrys-yntymaqtyń arqasy. Bul baǵytta elimizde barlyq jaǵdaı jasalǵan. Sonyń jarqyn mysalyn Aqmola oblysyndaǵy «Rodına» agrofırmasynan kórip keldik. Jumysqa jaǵdaı jasalǵany sondaı, kórýge kóz toımaıdy eken. Tazalyǵy qandaı deseńshi, kósheleri de keremet. Biz shetelge baryp, qarjymyzdy joıǵansha, osyndaı sapaly óz ónimderimizdi nege tutynbasqa, óz múmkindikterimizdi tolyq nege paıdalanbasqa! Qazaqstannyń ár óńirin, ár aýylyn osylaı gúldendirýge bolady», dedi Maqsot Bergen.
Sessııaǵa qatysqan oblys jastarynyń ókilderi Elgýn Djanalıev, Ilıar Mýtalıpov jáne Sáken Musa Jastar jylynda ózderine júktelgen jaýapkershilik júgi mol ekendigin aıtty.
«Bizge elimiz ne beredi emes, biz elge ne beremiz? dep oılanýymyz kerek. Sondyqtar barlyq jastarymyz eldiń damýyna óz úlesin qosýy kerek, biz de óz kúsh-jigerimizdi, bilimimizdi osyndaı bıik maqsat jolynda jumsaımyz», dedi jastar.
