Assambleıa jumysyn aıaqtady, biraq onyń tájirıbesi Halyq Keńesinde jalǵasady — Prezıdent
ASTANA. KAZINFORM — Qazaqstan halqy assambleıasynyń biregeı tájirıbesi eshqashan tarıh qoınaýyna ketpeıdi, kerisinshe, Halyq Keńesiniń jumysynda qoldanylady. Bul pikirdi Memleket basshysy Qasym-Jomart Toqaev Qazaqstan Halyq Keńesiniń birinshi sessııasynda aıtty.
— Qazaqstan halqynyń birligin nyǵaıtý — óte mańyzdy másele. Sondyqtan Qazaqstan Halyq Keńesi sabaqtastyqty saqtap, Qazaqstan halqy assambleıasy men Ulttyq quryltaıdyń dástúri men úzdik tájirıbesin jalǵastyrýy qajet, — dep atap ótti Prezıdent.
Bul rette búkil jumystyń sapasyn jańa saıası jáne uıymdastyrý deńgeıine kóterý qajet.
— Qabyldanǵan sheshimder men júrgizilip jatqan reformalardyń saldary etnomádenı birlestikterge qalaı áser etedi degen oryndy saýal, tipti alańdaýshylyq týyndaǵanyn bilemin. Qazaqstan halqy assambleıasy, shyn máninde, óz jumysyn aıaqtady. Biraq bul uıym aıasynda qalyptasqan paıdaly ınstıtýtsıonaldyq ınfraqurylym kereksiz bolyp qalady degendi bildirmeıdi. Sizderge týrasyn aıtaıyn: Qazaqstan halqy assambleıasynyń biregeı tájirıbesi eshqashan tarıh qoınaýyna ketpeıdi, kerisinshe, Halyq Keńesiniń jumysynda qoldanylady, — dedi Memleket basshysy.
Qasym-Jomart Toqaev jahandy turaqsyzdyq jaılap, dúrbeleńge toly kezeń kelgenin, alpaýyt memleketterdiń arasyndaǵy senimge selkeý túskenin basa aıtty.
Osyndaı jaǵdaıda Qazaqstandaǵy ýaqyt tezinen ótken etnosaralyq kelisim men jalpyulttyq birlik úlgisi aldaǵy ýaqytta da elimizdiń qarqyndy, ornyqty damýyna berik negiz bolady.
— Biz etnomádenı ortalyqtarǵa, teatrlarǵa, buqaralyq aqparat quraldaryna barynsha qoldaý kórsetemiz. Bul — memlekettiń konstıtýtsııalyq mindeti, — dedi el Prezıdenti.
Buǵan deıin Prezıdent 1 jylda eldiń saıası júıesi men memlekettik basqarýyna eleýli ózgeris ákelgen aýqymdy reformalar júzege asqanyn aıtqan edi.
Qasym-Jomart Toqaev Qazaqstannyń 7 jyldaǵy negizgi kórsetkishterin atady.
Sondaı-aq Halyq Keńesi men Quryltaı bir-biriniń jumysyna aralaspaıdy.
