Assambleıa jastaryna beriletin granttardyń sany artýy múmkin

ASTANA. QazAqparat – Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenova Senat depýtattarynyń saýalyna bergen jaýabynda etnomádenı birlestikterdiń jastaryna beriletin grant baǵyttary kóbeıetinin aıtty, dep habarlaıdy QazAqparat tilshisi.

«Prezıdenttiń tapsyrmasyn oryndaý aıasynda Aqparat jáne qoǵamdyq damý mınıstrligi Qazaqstan halqy Assambleıasy hatshylyǵynyń maquldaýymen Jol kartasyn ázirledi. Sonyń aıasynda búkil óńirge etnomádenı jáne ultaralyq kommýnıkatsııany damytýǵa baǵyttalǵan basqa da qoǵamdyq birlestikterge beriletin memlekettik tapsyrys pen grant arqyly qarjylandyrý kólemin qaıta qaraý tapsyryldy. Ol tapsyrystar men grant konkýrstaryna búkil respýblıkalyq, óńirlik jáne jergilikti etnomádenı birlestikter qatysa alady», - deıdi Tamara Dúısenova.

Vıtse-premerdiń aıtýynsha, Aqparat jáne qoǵamdyq damý mınıstrligi jergilikti ákimdiktermen birge etnomádenı birlestikterge bólinetin maqsatty granttardyń taqyryp aıasyn keńeıtý máselesin qarastyryp jatyr.

«Mınıstrlik etnomádenı birlestikterdiń jastaryna beriletin «Táýelsizdik urpaqtary» grantynyń baǵyttaryn keńeıtý máselesin qarap jatyr. Osy jumystardyń aıasynda QHA etnomádenı birlestikteri jastaryna arnalǵan granttardyń baǵyttaryn 5-ten 7-ge deıin ulǵaıtý (memlekettik tildiń tanymaldyǵyn arttyrý, ultaralyq qarym-qatynasty úndestirý jáne t.b.) usynylyp otyr», - dep jazylǵan jaýapta.