Assambleıa jastary jalpyulttyq biregeılikti dáripteýde aldyńǵy sapta bolýy tıis
ShYMKENT. KAZINFORM - Qazaqstan halqy Assambleıasy tóraǵasynyń orynbasary, Qazaqstan Respýblıkasy Prezıdenti Ákimshiliginiń QHA hatshylyǵynyń meńgerýshisi Marat Ázilhanov Shymkent qalasyna jasaǵan jumys sapary aıasynda Dostyq úıinde jańǵyrtýdan ótken etnomurajaıdy aralap, jergilikti etnos ókilderiniń qoldaýymen jınalǵan jádigerlermen tanysty. Jalpyulttyq birlikti bekemdeýde mádenı muranyń alar orny erekshe ekenin atap ótti.
Komıýnıtı ortalyǵynda «Assambleıa jastary» respýblıkalyq qoǵamdyq birlestigi qalalyq ókildiginiń múshelerimen ótken kezdesýde shymkenttik «Assambleıa jastary» uıymynyń qyzmeti jaıly aıtqan «Assambleıa jastary» RQB tóraǵasy Tımýr Jumyrbaev elimizdegi úshinshi megapolıs jastarynyń belsendiligin tilge tıek etti. Tamyzda Shymkent qalasy ákimdiginiń qoldaýymen «Assambleıa jastary» uıymynyń «Biz birgemiz» lagerin laıyqty ótkizgenin habarlap, Dostyq úıi bazasynda ashylǵan komıýnıtı ortalyq qalalyq ókildiktiń jumysyn jaqsartyp, jańa deńgeıge kóteretini týraly atap ótti.
Qazaqstan halqy Assambleıasy tóraǵasynyń orynbasary belsendi jastarmen ótken júzdesýde qazaqstandyq patrıotızmdi damytý, memlekettik tildi dáripteý baǵytynda atqarylǵan jumystar týraly jas býynmen erkin formatta pikir almasty.
Jańa esimderdi qoǵamǵa tanystyrý, ekologııalyq mádenıetti damytý, qorshaǵan ortaǵa qamqorlyq jasaý qaǵıdalaryn nasıhattaý maqsatynda ázirlengen «Jańa tolqyn» jobasy men «Taza Qazaqstan» aktsııasyna «Assambleıa jastary» uıymynyń turaqty atsalysýyn úılestirý, Qazaqstan halqy Assambleıasynyń 30 jyldyǵy aıasynda uıymdastyrylǵan túrli is-sharalar men qolǵa alǵan jobalardy nátıjeli iske asyrý jaıyna aıryqsha toqtaldy.
– «Assambleıa jastary» – jalpyulttyq biregeılikti dáripteýde aldyńǵy sapta bolýy tıis. Assambleıa el jastaryn qoǵamdyq kelisim men birlik qundylyqtary tóńiregine shoǵyrlandyrýdy jalǵastyrady. Biz qoǵamdyq kelisim men jalpyulttyq birlikti bekemdeý jolynda jastarmen birlese jumys isteýge, baǵyt-baǵdar berýge árdaıym daıynbyz, – dedi Marat Almasuly.
Kezdesýdi qorytyndylaǵan QHA tóraǵasynyń orynbasary Marat Ázilhanov alda birlese atqarar jumys jaıyn pysyqtap, «Assambleıa jastary» RQB Shymkent qalalyq ókildiginiń belsendileri Nurbolat Meıirbekov, Mýrodjan Irısmetov, Shahnozaboný Janalıeva, Asııa Manapova, Ibrahım Vıshanov syndy belsendilerine Qazaqstan halqy Assambleıasynyń alǵys hatyn tabystady. Óz kezeginde uıym múshesi Akram Irısmetov dombyraman án salyp, jurtshylyqtyń ystyq yqylasyna bólendi.
