Assambleıa jáne bılik organdary ózara tyǵyz baılanysta bolýǵa tıis - Prezıdent

ASTANA. QazAqparat – Partııalardy ortaq iske jumyldyrýdyń taǵy bir mańyzdy joly – Parlamentte depýtattyq birlestik qurý. Bul týraly Qazaqstan halqy Assambleıasynyń HHHІІ sessııasynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Partııalardy ortaq iske jumyldyrýdyń taǵy bir mańyzdy joly – Parlamentte depýtattyq birlestik qurý. Assambleıadan saılanǵan bes senator bul sharýanyń basy-qasynda júrýi kerek. Etnosaralyq qatynas salasyndaǵy ózin ózi basqarý ınstıtýttaryn damytý – mańyzdy mindettiń biri. Assambleıa bul jumysty etnomádenı birlestikterdiń qyzmetin úılestirý arqyly atqarýda. Osynda mınıstrlikterdiń, mekemelerdiń, aımaqtardyń, Parlamenttiń jáne Prezıdent Ákimshiliginiń basshylary otyr. Olardyń kópshiligi – Assambleıa múshesi. Assambleıa qyzmetine belsene atsalysý – barshańyzǵa ortaq mindet», - dedi Qasym-Jomart Toqaev.

Memleket basshysy Assambleıa da ákimdikter men máslıhat jumysyna atsalysýy qajettigin atap ótti.

«Bir sózben aıtqanda, Assambleıa jáne bılik organdary ózara tyǵyz baılanysta bolýǵa tıis. Munyń aıryqsha máni bar. Quzyretterdi joǵarydan tómenge berý isinde osy máseleni eskergen jón. Memlekettik organ basshylary Assambleıa ókilderimen turaqty kezdesip otyrýy qajet. Mundaı kezdesýler kem degende jarty jylda bir ret ótkizilýi kerek», - dedi Prezıdent