Assambleıa sessııasy Qazaqstannyń beıbitshilik jáne kelisim mádenıeti strategııasyn damyta túsedi - A.Sádýaqasova

ASTANA. QazAqparat - Qazaqstan halqy Assambleıasynyń sessııasy Qazaqstannyń beıbitshilik jáne kelisim mádenıetin nyǵaıtyp, el strategııasynyń mańyzdy qadamyn belgilemek. Bul týraly búgin Astanadaǵy Ortalyq kommýnıkatsııalar qyzmetinde ótken baspasóz máslıhatynda ulysaralyq jáne dinaralyq qarym-qatynastardy zertteý ortalyǵynyń dırektory Aıgúl Sádýaqasova habarlady.

«Eń basty maqsat - beıbitshilik mádenıetin, kelisim mádenıetin qalyptastyrý máselesi qarastyrylady. Qazaqstannyń «birtutas memleket, bir halyq, bir el» atty maqsattary da talqyǵa salynady», - dedi ol.

Onyń oıynsha, sessııada Assambleıanyń óńirlerdegi jumysyn tereńdetý, oblysaralyq qarym-qatynastardy joǵary deńgeıge kóterý máselesi de úlken mańyzǵa ıe bolýy tıis.

«Byltyr Qazaqstan halqy Assambleıasynyń 20-shy sessııasynda QR Prezıdenti Assambleıanyń jumysy ári qaraı tereńdep, árbir óńir-óńirge jetý kerek degen mindet qoıyp, halyqtyń jaǵdaıyn jaqsartý, eldiń birligin saqtaý maqsatynda qyrýar ister atqarýdy tapsyrǵan bolatyn. Elishilik, aımaqtyq kólemdegi ıntegratsııa tájirıbe almasýǵa óte qolaıly, óńirdegi ishki úderisterdi ózge aımaqtaǵy ókilder de kórýi tıis. Sezd otyrysynda osy yqpaldastyq úderisi jandandyrylyp, óńirlik damýǵa da úlken septigin tıgizedi dep sanaımyn», - dep atap ótti A.Sádýaqasova.

Eske sala keteıik, kelesi aptada, 18 sáýir kúni Qazaqstan halqy Assambleıasynyń XXI sessııasy ótkeli otyr.